بەپێی هەواڵی کوردپرێس، پاش وتەکانی ڕۆژی ڕابردووی ڕەجەب تەییب ئەردۆغان، سەرۆک کۆماری تورکیا لەباەری هەوڵی سەربازی لە ڕۆژهەڵاتی فورات، هەواڵدەریی هاورانیووز لە زاری سەرچاوە خۆجێییەکانەوە ڕایگەیاند: ئەرتەشی تورکیا دەستی کردووە بە گواستنەوەی هێز و چەک بەرەو کانتۆنە کوردنشینەکانی کۆبانی و گرێ سپی لە باکووری سووریا.

بەگوێرەی زانیارییەکان هێزەکانی سوپای تورکیا سەرقاڵی ئامادەبوونن بۆ ئەنجامی ئۆپەراسیۆنی سەربازی لە قەراخی ڕووباری فورات و گوندەکانی زۆراوان، بوبان و ئاشە.

هەروەها ئەو هەواڵانەی کە لە ناوچەی گرێ سپی بەدەست گەیشتوون باس لە گواستنەوەی بەربڵاوی هێز و جیهازاتی سەربازیی ئەرتەشی تورکیا دەکەن بەرەوە کانتۆنی کوردنشینی گرێ سپی کە ئێستا لەژێر دەسەڵاتی هێزە کوردەکانی سووریایە؛ هەروەها ڕاپۆرتەکان باس لەوە دەکەن کە ئەرتەشی تورکیا 3 هەزار هێزی چەکداریی لە گوندەکانی ئاک چاکال لە سنووری تورکیا لە نزیکیی گرێ سپی جێگیر کردووە.

کۆدی هەواڵنێر: 60113