به‌پێی هه‌واڵی کوردپرێس، یان كۆبیش نوێنه‌ری تایبه‌تی سكرتێری گشتیی نه‌ته‌وه یه‌كگرتوووه‌كان پیرۆزبایی له به‌رهه‌م ساڵح ده‌كات به بۆنه‌ی هه‌ڵبژاردنی وه‌ک سه‌رۆكی كۆماری عێراق له‌لایه‌ن ئه‌نجومه‌نی نوێنه‌رانه‌وه و داواش ده‌كات په‌له بكرێت له پێكهێنانی حكوومه‌تی نوێ.
نێرده‌ی نه‌ته‌وه یه‌كگرتوووه‌كان بۆ هاریكاری عێراق (یونامی) ده‌شڵێت: هه‌موو به‌شه‌كانی نه‌ته‌وه یه‌كگرتوووه‌كان به په‌رۆشییه‌وه چاوه‌ڕوانی كاركردنن له‌گه‌ڵ سه‌رۆكی نوێ بۆ زامن كردن و جێبه‌جێ كردنی ده‌ستوور بۆ به‌هێزتركردنی عێراق وه‌ک ده‌وڵه‌تێكی یه‌كپارچه و فیدڕاڵی و دیموكراسی و بۆ پشتگیری كردنیشی له چاكسازی دوای جه‌نگ و دووباره بنیاتنانه‌وه و هه‌ڵسانه‌وه‌ی وڵاته‌كه له‌پێناو به‌رژه‌وه‌ندیی خه‌ڵكی عێراق.
یان كوبیش ده‌ستخۆشی له كاندیداکان ده‌كات بۆ هه‌ست كردن به به‌رپرسیارێتیان له كاتی ڕكابه‌ری كردن بۆ ئه‌م پۆسته و هه‌روه‌ها هه‌وڵ و ماندووبوونی ئه‌نجومه‌نی نوێنه‌رانیش به سه‌رۆكایه‌تیی محه‌مه‌د حه‌لبوسی به‌رز ده‌نرخێنێت بۆ ئه‌نجامدانی هه‌ڵبژاردنه‌كه له ماوه‌ی دیاریكراوی ده‌ستووریدا.
نوێنه‌ری نه‌ته‌وه یه‌كگرتوووه‌كان داوا له سه‌ركرده ده‌ستوورییه‌كان و هێزه سیاسییه‌كانی نێو ئه‌نجومه‌نی نوێنه‌ران ده‌كات كه پرۆسه‌كه خێرا بكه‌ن، به هه‌مان گڕوتین و پابه‌ندبوون به ماوه‌ی دیاریكراوی ده‌ستوورییه‌وه، له پرۆسه‌ی ده‌ستنیشانكردنی سه‌رۆک وه‌زیران و دواتریش به پێكهێنانی حكوومه‌تی چاكساز و نامه‌زهه‌بی و نیشتیمانی كه به‌ند بێت له‌سه‌ر بنه‌مای هاوبه‌شێتی و هه‌ماهه‌نگی نێوان پێكهاته و گرووپه جیاوازه‌كانی عێراق و هه‌روه‌ها له‌سه‌ر بنه‌ماكانی هاووڵاتی بوون و یه‌كسانی له ماف و به‌رپرسیارێتی و ده‌رفه‌تدا. ئه‌م جۆره حكوومه‌ته ده‌توانێت وڵاته‌كه یه‌كبخاته‌وه و مامه‌ڵه له‌گه‌ڵ چاكسازیی ڕیشه‌یی له بواری سیاسی و ئابووری و كۆمه‌ڵایه‌تی كه دڵنیایی بدات به به‌ره‌نگاربوونه‌وه‌ی گه‌نده‌ڵی و په‌ره‌پێدانی بووژاندنه‌وه‌ی ئابووری و فه‌راهه‌م كردنی خزمه‌تگوزاری و داهاتوویێكی شكۆمه‌ندانه بۆ خه‌ڵكی عێراق به‌ده‌ستبهێنێت. هه‌روه‌ها ئه‌و حكوومه‌ته ده‌توانێت سه‌ربه‌خۆیی و به‌رژه‌وه‌ندییی وڵاته‌كه بپارێزێت به هه‌ماهه‌نگی له‌گه‌ڵ هه‌موو دراوسێكانی و پشتگیریكارانی نێوده‌وڵه‌تی و سه‌روه‌ریی وڵاته‌كه‌شی بپارێزێت.
سه‌رچاوه: PUK media
کۆدی هه‌واڵنێر: 60103
Your Comment