کوردپرێس:

لەکاژێر 08:00 ی سەرلەبەیانی رۆژی یەکشەممە 30-9-2018 لەسەرجەم شار و شارۆچکە و گوندەکانی کوردستان دەرگای بنکەکانی دەنگدان بەڕووی دەنگدەراندا کرانەوە بۆ ئەوەی دەنگی خۆیان بخەنە نێو سندووقەکانی دەنگدان و نوێنەری خۆیان بۆ چوارساڵی داهاتوو لە پەرلەمانی کوردستان هەڵبژێرن.

دوو ملیۆن و 914 هەزار و 992 کەس مافی دەنگدانیان هەیە و 29 قەوارە و لیستی جیاجیا لەم هەڵبژاردنە رکابەری لەسەر بەدەستهێنانی 111 کورسی پەرلەمانی کوردستان دەکەن.

ئەنجوومەنی کۆمیسیارانی کۆمیسیۆنی هەڵبژاردن و راپرسی هەرێمی کوردستان درەنگانی شەوی رابردوو شەش بڕیاری بەپەلەی دەرکرد و رایگەیاند، لە رۆژی دەنگداندا ئەوەی "رەگەزنامەی عێراقی- جنسیە عێراقی" دەبات پێویستە "ناسنامەی باری شارستانیشی - هەویەی ئەحوال مەدەنی" پێبێت، ئەگەرنا ناتوانێ دەنگ بدات.

نێچیرڤان بارزانی، سەرۆکی حکومەتی هەرێمی کوردستان، لە بنکەی دیاربەکر لە هەولێر ئامادەبوو و دەنگی خۆی خستەنێو سندووقی دەنگدان.

هەروەهاش قوباد تاڵەبانی، جێگری سەرۆکی حکومەتی هەرێمی کوردستان هەر لەسەرەتای کردنەوەی دەرگای بنکەکان، لە بنکەی رەوشەن بەدرخان لە سلێمانی دەنگی خۆی خستە نێو سندووقی دەنگدان.