به‌پێی هه‌واڵی کوردپرێس، له په‌یوه‌ندییه ته‌له‌فۆنییه‌كه‌دا كه ئێواره‌ى ڕۆژی دووشه‌ممه 10/8/2018 ئه‌نجام درا مایک پێنس جێگرى سه‌رۆكى ئه‌مه‌ریكا و نێچیرڤان بارزانی سه‌رۆک وه‌زیرانى هه‌رێمى كوردستان ڕۆڵى هه‌رێمى كوردستان و هه‌وڵه‌كان بۆ پێكهێنانى كابینه‌ى نوێى حكوومه‌تى عێراقیان تاوتوێ كرد و جه‌ختیان له هاوبه‌شیى ستراتێژیى نێوان هه‌رێمى كوردستان و وڵاته یه‌كگرتوووه‌كانى ئه‌مه‌ریكا كرده‌وه.
نێچیرڤان بارزانى سوپاس و پێزانینى هه‌رێمى كوردستانى بۆ ئه‌مه‌ریكا دووپات كرده‌وه كه له شه‌ڕى دژى داعشدا هاوكاریى هه‌رێمى كوردستان و عێراقى كردوووه و جه‌ختى له په‌ره‌پێدانى زیاترى هاوكارى و هه‌ماهه‌نگیى نێوان هه‌ردوولا كرده‌وه بۆ سه‌ركه‌وتنى یه‌كجارى به سه‌ر تیرۆردا له هه‌موو عێراق.
له په‌یوه‌ندییه ته‌له‌فۆنییه‌كه‌یدا مایک پینس جێگرى سه‌رۆكى ئه‌مه‌ریكا وێڕاى ستایش و پێزانین بۆ ڕۆڵ و قاره‌مانییه‌تیى پێشمه‌رگه له شه‌ڕى دژى تیرۆردا سوپاسى نێچیرڤان بارزانى سه‌رۆک وه‌زیرانی كرد بۆ ئه‌و پێكه‌وه‌ژیان و ئازادییه ئایینییه‌ى له هه‌رێمى كوردستان هه‌یه و هه‌ردوولا داكۆكییان له كارى هاوبه‌ش و هه‌مانگى كرده‌وه بۆ یارمه‌تیدانى ئاواره و پێكهاته ئایینییه‌كان له عێراق تاكوو بتوانن بگه‌ڕێنه‌وه سه‌ر ماڵ و حاڵى خۆیان.
سه‌رچاوه: ماڵپه‌ڕی فه‌رمیی پارتی دیموکراتی کوردستان
کۆدی هه‌واڵنێر: 60103
Your Comment