به‌پێی هه‌واڵی کوردپرێس، فه‌رمانده‌ییی ئۆپه‌راسیۆنی هاوبه‌ش له‌ به‌یاننامه‌یێكدا ڕای‌گه‌یاند: حه‌یده‌ر عه‌بادی سه‌رۆكوه‌زیرانی عێراق له‌ باره‌گای فه‌رمانده‌ییی ئۆپه‌راسیۆنی هاوبه‌ش سه‌رپه‌رشتی كۆبوونه‌وه‌یێكی ئه‌منی له‌باره‌ی ره‌وشی ئه‌منیی به‌سره‌ی كردوووه‌ و له‌ كۆبوونه‌وه‌كه‌دا بڕیار دراوه‌ "ڕێوشوێنی تایبه‌ت بۆ پاراستنی ئاسایش و پاراستنی به‌رژه‌وه‌ندیی گشتی و تایبه‌ت بگیرێته‌به‌ر و فه‌رمانیش دراوه‌ ده‌ستی هێزه‌ ئه‌منییه‌كان كراوه‌ بێت بۆ مامه‌ڵه‌كردن له‌گه‌ڵ "كرده‌ی گێره‌شێوێنی" كه‌ له‌ ناو خۆپیشاندانه‌كاندا ڕوو ده‌ده‌ن و پارێزگاریی له‌ دامه‌زراوه‌كانی كه‌رتی گشتی و تایبه‌ت بكرێت و (یاسا بسه‌پێنرێت)."

فه‌رمانده‌ییی ئۆپه‌راسیۆنی هاوبه‌ش ئاماژه‌ی به‌وه‌ش كردوووه‌ "له‌سه‌ر هێزه‌ ئه‌منییه‌كان پێویسته‌ پابه‌ندی ئه‌و فه‌رمانانه ‌بن و ڕێوشوێنی یاساییی توند بگرنه‌به‌ر و داوا له‌ هاووڵاتیانیش ده‌كه‌ن هاوكاریی له‌گه‌ڵ هێزه‌ ئه‌منییه‌كان بكه‌ن و له‌ هه‌ر گردبوونه‌وه‌یێک كه‌ ئامانجی په‌لاماردانی دامه‌زراوه‌كانه‌ دوور كه‌ونه‌وه‌ و هاوكاریی ئه‌و گرووپانه‌ نه‌كه‌ن و له‌ ناوچه‌یێكه‌وه‌ بۆ ناوچه‌یێكی دیكه‌ نه‌یانگوازنه‌وه‌ و پابه‌ندی رێنماییه‌كانی دامه‌زراوه‌ ئه‌منییه‌كان بن."

شایانی باسه‌؛ ماوه‌ی چه‌ند مانگێكه‌ خۆپیشانده‌رانی پارێزگای به‌سره‌ له‌ ده‌سه‌ڵاتدارانی عێراق تووڕه‌ن و خه‌ڵكی ئه‌و پارێزگایه‌ به ‌شێوازی جۆراوجۆر ناڕه‌‌زایی دژی نه‌بوونی خزمه‌تگوزارییه‌ بنه‌ڕه‌تییه‌كانی ژیان ده‌رده‌بڕێن و ده‌ڵێن: "ته‌نانه‌ت ئاوی خواردنه‌وه‌یان نییه‌ و ئاوی سوێر ده‌خۆنه‌وه‌ و به‌و هۆیه‌شه‌وه‌ نه‌خۆشی و په‌تا له‌ پارێزگاكه‌ بڵاو بوووه‌ته‌وه‌."

سه‌رچاوه‌: هه‌واڵده‌ریی "روسیه‌ الیوم"

کۆدی هه‌واڵنێر: 60103