بەپێی هەواڵی کوردپرێس، لە کۆنگرەیێکی رۆژنامەڤانیدا دوای کۆتایی هاتنی کۆبوونەوەکەیان، حەیدەر عەبادی سەرۆکوەزیرانی عێراق ئاماژەی بەوەکرد لەگەڵ سەرۆکی تورکیا باسیان لە پرسی تیرۆر، ئاو و وزە و چەند پرسێکی دیکەش کردووە.

عەبادی جەختی کردەوە، رێگەنادەن هیچ گرووپێکی چەکدار لە خاکی عێراقەوە مەترسی لەسەر ئاسایشی تورکیا دروست بکات. گوتیشی "پلانمان بۆ زیاتر پاراستنی سنووری نێوان عێراق و تورکیا هەیە".

حەیدەر عەبادی ئاشکراشی کرد، ئەردۆغان دووپاتی کردووەتەوە تورکیا پابەندی بەڵێنەکانی دەبێت و هاوکار دەبێت لە ئاوەدانکردنەوەی عێراق. پێشوازیش دەکەن لە کردنەوەی کۆنسوڵخانەی تورکیا لە موسڵ.

سەرۆکی تورکیا و سەرۆک وەزیرانی عێراق لەبارەی نەوتی کەرکووکیش گفتوگۆیان کردووە. عەبادی گوتی: "کاردەکەین بۆ ئەوەی بەزوویی نەوتی کەرکووک لەڕێگەی تورکیاوە هەناردە بکرێت".

رەجەب تەیب ئەردۆغانیش کۆبوونەوەکەی لەگەڵ حەیدەر عەبادی بە سوودبەخش ناوبرد و گوتی کۆمەڵێک بابەتی گرنگمان تاوتوێ کرد.

ئەردۆغان رایگەیاند: رێز لە سەروەریی خاکی عێراق دەگرین. عێراق قۆناخەکانی داعش و گشتپرسی تێپەڕاند. ئێمە هەمیشە گرفتی عێراقمان بە هی خۆمان زانیووە. عێراق و تورکیا لە زۆر بابەتدا یەک چارەنووسیان هەیە".

لەبارەی حکوومەتی نوێی عێراق، ئەردۆغان رایگەیاند "هیوادارین حکوومەتێک پێک بهێندرێت رەنگدانەوەی هەموو پێکهاتەکانی عێراق بێت".

سەبارەت لە پەکەکەش، ئەردۆغان گوتی: بۆچوونی خۆمان لەبارەی پەکەکە بە حەیدەر عەبادی راگەیاند، لەگەڵ عێراق هاوڕاین لەبارەی رووبەڕووبوونەوەی تیرۆر".

سەبارەت بە تورکمانەکان، سەرۆکی تورکیا رایگەیاند تورکمانەکانی کەرکووک رووبەڕووی هێرش و پەلامار بوونەتەوە".

بەگوتەی ئەردۆغان هەروەها لە کۆبوونەوەکەدا رێکەوتوون لەسەر کردنەوەی دەروازەیێکی سنووریی نوێ لەگەڵ عێراق.

کۆدی هەواڵنێر: 60113