بەپێی هەواڵی کوردپرێس، سه‌ڵاحه‌دین بابه‌کر ئه‌ندامى مه‌کته‌بى سیاسیى یه‌کگرتووى ئیسلامیى کوردستان ئاشکرای کرد، وه‌ک یه‌کگرتوو پڕۆژه‌یێکیان هه‌بووه و سه‌ردانى سه‌رجه‌م لایه‌نه‌کانى ده‌ره‌وه‌ى یه‌کێتى و پارتیشیان کردووه و هه‌وڵیان داوه به‌ره‌یێکى ده‌ره‌وه‌ى ده‌سه‌ڵات له حزبه ئۆپۆزسیۆنه‌کان و که‌سایه‌تیه‌کان و ڕێکخراوه‌کان دروست بکه‌ن.
ناوبراو ده‌شڵێت: "دڵنیابووین ئه‌و به‌ره‌یه ده‌یتوانى براوه‌ى هه‌ڵبژاردنى داهاتووبێت و حکوومه‌تى داهاتووى هه‌رێم ئه‌و به‌ره‌یه پێکیبهێنێت، به‌ڵام ئه‌م به‌ره‌یه پێکنه‌هات و ئێستاش نامانه‌وێت بڵێین کێ هۆکاربووه بۆ دروست نه‌بوونى".
سه‌ڵاحه‌دین بابه‌کر وتیشى: هه‌ماهه‌نگی و لێکتێگه‌شتنیان له‌گه‌ڵ هه‌ندێک لایه‌ن هه‌یه بۆ هه‌ڵبژاردنى ئه‌نجومه‌نى نوێنه‌ران، به‌ڵام ڕێکه‌وتنى سیاسیان نییه.
سه‌ڵاحه‌دین بابه‌کر ئه‌وه‌شی خسته‌ڕوو، ئه‌وانه‌ى ڕه‌خنه له یه‌کگرتوو ده‌گرن له‌شه‌ڕى په‌که‌که و تورکیا و به‌لایه‌ندارى تورکیاى ده‌زانن، په‌که‌که نین، به‌ڵکوو سه‌رکردایه‌تى په‌که‌که خۆیان ده‌زانن یه‌کگرتوو چه‌ند هه‌وڵیداوه بۆئه‌وه‌ى پرۆسه‌ى ئاشتى له‌نێوان تورکیا و په‌که‌که بێته ئاراوه.
ئه‌ندامەکەی مه‌کته‌بى سیاسى یه‌کگرتوو باسى له‌وه‌ش کرد، "ئه‌و داهاته‌ى ئێستا له هه‌رێم هه‌یه، به‌شى مووچه‌ى مووچه‌خۆران ده‌کات، لێبڕینى مووچه بڕیارێکى نایاساییه و له‌سه‌ره‌تا ڕاگه‌یه‌ندرا لێبڕین بۆ یه‌ک مانگه، له‌گه‌ڵ ئه‌وه‌ى نرخى نه‌وت به‌رزبووه‌ته‌وه 460 هه‌زار به‌رمیل نه‌وت به72 دۆلار بۆهه‌ر به‌رمیلێک ڕۆژانه ده‌فرۆشرێت، ئه‌ى ئه‌و هه‌موو داهاته چى لێدێت و داهاتى ئێستا به‌زیاده‌وه به‌شى مووچه‌ى فه‌رمانبه‌ران ده‌کات و کێشه له ئیداره‌دانى داهات و سه‌روه‌ت و سامانى هه‌رێمه".
کۆدی هەواڵنێر: 60113
Your Comment