بەپێی هەواڵی کوردپرێس، نێچیرڤان بارزانی، سەرۆکی هەرێمی کوردستان لە تۆڕی ئێکس لە پەیامێکدا ئاشکرایکرد، کۆبوونەوەیەکی بەرهەمداری لەگەڵ سەرۆک وەزیرانی عێراق کردووە، باسیان لە دۆخی وڵات و ئەو ئالنگارییانە کردووە کە ڕوبەڕویان دەبنەوە.

بارزانی دەشڵێت، پەرەسەندن و گۆڕانکارییە هەرێمییەکانیان خستووەتەڕوو، لەسەر هەردوو ئاستی هەرێمی و نێودەوڵەتی و کاریگەرییەکانیان لەسەر عێراق.

نێچیرڤان بارزانی ڕاشیگەیاندووە، پاڵپشتیی هەرێمی کوردستان و کارکردنی هاوبەشی بۆ سەرۆک وەزیرانی عێراق دووپاتکردووەتەوە بۆ جێبەجێکردنی کارنامەی حکوومەتەکەی بەشێوەیەک کە لە خزمەتی سەرجەم پێکهاتەکان و بەدیهێنانی بەڵێنەکان بێت کە بە گەل دراون.