بەپێی هەواڵی کوردپرێس، لە کۆنفرانسێکی ڕۆژنامەوانیدا کە ڕۆژی دووشەممە، ٢٧ـی نیسانی ٢٠٢٦، لە پەرلەمانی تورکیا بەڕێوەچوو، سەزایی تەمەللی ڕەخنەی لە سستیی پرۆسەی چارەسەری گرت و جەختی لەوە کردەوە کە بۆ سەرکەوتنی هەر دیالۆگێک، پێویستە ژینگەیەکی دیموکراسی و یاسایی بۆ دانوستاندنکارەکان فەراهەم بکرێت.

بریکاری سەرۆکی فراکسیۆنی دەم پارتی ئاماژەی بەوە کرد، "ئۆجەلان لایەنێکی سەرەکی و دانوستاندنکاری گرنگە"، بۆیە پێویستە هەلومەرجی ژیان و کارکردنی لە ئاستێکی تەندروستدا بێت. ناوبراو جەختیشی کردەوە کە ئەم پرۆسەیە تەنیا بە هەوڵەکانی دەم پارتی ناگاتە ئەنجام، بەڵکو پێویستە ئاکپارتی و حکومەت هەنگاوی یاسایی پێویست بنێن بۆ جێگیرکردنی شێوازی دانوستاندنەکان و بەهێزکردنی زەمینەی دیموکراسی بۆ دیالۆگی سیاسی.