بەپێی هەواڵی کوردپرێس، پارێزگاری هەولێر لە ڕاگەیێندراوێکدا بڵاوی کردەوە: سەبارەت بەو دەنگۆیانەی لە چەند کەناڵ و پەیجێکی تۆڕە کۆمەڵایەتییەکان بڵاوکراوەتەوە، کە گوایە بەرپرسێکی ڕژیمی پێشوو لە شاری هەولێر کۆچی دوایی کردووە و سێ ڕۆژیش پرسەی بۆ دادەنرێت، بە هەموو شێوەیەک ئەم هەواڵە بێبنەمایە ڕەت دەکەینەوە و دووپاتی دەکەینەوە کە ئەم دەنگۆیانە دوورن لە ڕاستی و هیچ بنەمایەکیان نییە، پرسەی ئەو بەرپرسەش لە هەولێر بەڕێوە نەچووە و بەڕێوەش ناچێت.

دەشڵێت بۆ ڕای گشتی ڕوونی دەکەینەوە، بەداخەوە وەک پیشەی هەمیشەییان چەند کەناڵێکی دوور لە مۆڕاڵ هەولێریان بە ئامانج گرتووە، بۆیەش لە سەر ئەو هەواڵە ناڕاستە بینیمان چەند کەسێکی بەرپرسی نائاگا قسە و لێدوانیان لەسەر ئەو بابەتە داوە.

پارێزگاری هەولێر وتیشی: لێرەوە ڕایدەگەیەنین، بە مافی خۆمانی دەزانین هەر کەسێک لە هەر پلە و پۆستێک بێت، لەگەڵ تەواوی کەناڵەکان کە ئەم جۆرە هەواڵە ناڕاستانەیان بڵاوکردبێتەوە، ڕووبەڕووی لێپرسینەوە و ڕێکاری توندی یاسایییان بکەینەوە.