بەپێی هەواڵی کوردپرێس، لە بەشێکی پەیوەندییەکەدا، هەردوولا بیروڕایان لەبارەی بارودۆخی سیاسیی ناوچەکە بە گشتی و دوایین پەرەسەندن و گۆڕانکارییەکانی وڵاتی سووریا ئاڵوگۆڕ کرد. جەخت کرایەوە لەسەر گرنگیی چاودێریکردنی وردی ڕووداوەکان و کاریگەرییان لەسەر هاوسەنگیی هێز لە ناوچەکەدا.

مەسعوود بارزانی و تۆم باراک هاوڕا بوون لەسەر پێویستیی گرتنەبەری هەموو هەنگاوێکی پێویست بۆ ڕێگریکردن لە هەر پشێوی، ئاڵۆزی و شەڕێک. هەردوولا کۆک بوون کە دەبێت کار بۆ چەسپاندنی ئاشتی و سەقامگیری بکرێت، هەروەها دەستخۆشییان لە یەکتری کرد بۆ ئەو ڕۆڵە کاریگەرەی لەو پێناوەدا گێڕاویانە.

لە کۆتایی پەیوەندییەکەدا، بارزانی پێزانینی خۆی بۆ ڕۆڵی کاریگەری ئەمریکا دەربڕی. هاوکات جەختی لە بەردەوامی و پتەویی هاوپەیمانێتیی نێوان گەلی کوردستان و ویلایەتە یەکگرتووەکانی ئەمریکا کردەوە وەک بنەمایەکی سەرەکی بۆ پاراستنی بەرژەوەندییە هاوبەشەکان.