بەپێی هەواڵی کوردپرێس، شێخی ئەزهەر لە پۆستێکدا لە پلاتفۆرمی فەیسبووک نووسیویەتی: "بە تووندی سەرکۆنەی بەردەوامیی هێرشی قەوارەی داگیرکەر بۆ سەر کۆماری ئیسلامیی ئێران و ئەو هێرشە بەرنامە بۆداڕێژراو  و تووندوتیژییە بەردەوامە دەکەم کە ئەو قەوارە قۆرخکار و شەڕانگێزە دەیکات".

بە بڕوای ئەحمەد تەیب، ئامانجی ئیسرائیل لەو هێرشانە، "ڕاکێشانی ناوچەکەیە بۆ لێواری تەقینەوە و هەڵگیرساندنی شەڕێکی سەرتاسەری کە تەنیا بازرگانانی خوێن و چەک تێیدا سەردەکەون".

ئەحمەد تەیب رایگەیاندووە: "بێدەنگیی کۆمەڵگەی نێودەوڵەتی لەسەر ئەم ستەمکارییە و شکستهێنانی لە وەستاندنی، وەک هاوبەشییە لە تاوانکارییەکەدا و بەرهەمەکەشی هەڕەشەکردنە بۆ سەر ئاسایشی هەموو جیهان؛ شەڕیش ناتوانێت ئاشتی دروست بکات".