بەپێی هەواڵی کوردپرێس، ئیمانوێل ماکرۆن، سه‌رۆکی فه‌ره‌نسا له کۆنفرانسێکی ڕۆژنامه‌وانیدا له‌گه‌ڵ جۆزێف عۆن، سه‌رۆکی لوبنان ڕایگه‌یاند، ئاماده‌یه پێشوازی له ئه‌حمه‌د شه‌رع، سه‌رۆکی قۆناغی ڕاگوزه‌ری سووریا بکات به‌و مه‌رجه‌ی حکوومه‌ته‌که‌ی به ڕووی کۆمه‌ڵگه‌ی مه‌ده‌نی بکرێته‌وه و ده‌سته‌به‌ری ئاسایش بکات بۆ گه‌ڕانه‌وه‌ی ئاواره سوورییه‌کان.
ئیمانوێل ماکرۆن جه‌ختی کرده‌وه، ده‌بێت حکوومه‌تی نوێی سووریا هه‌موو پێکهاته‌کانی ئه‌و وڵاته له‌به‌رچاو بگرێت و به ئاشکرا و ڕاشکاوانه‌یش ڕووبه‌ڕووی تیرۆر ببێته‌وه ده‌سته‌به‌ری گه‌ڕانه‌وه‌ی ئاواره‌کانیش بکات، که ئه‌م سێ مه‌رجه‌یش به لای پاریس سێ ڕه‌گه‌زی سه‌ره‌کین له حوکمڕانی قۆناغی ڕاگوزه‌ری سووریا.
ماکرۆن گوتیشی، ئاماده‌ن گفتوگۆکانیان له‌گه‌ڵ ده‌سه‌ڵاتدارانی نوێی سووریا به‌رده‌وامی پێ بده‌ن و پێشوازیی له ئه‌حمه‌د شه‌رع بکه‌ن و له چه‌ند هه‌فته‌ی داهاتووش ئه‌م پرسه یه‌کلایی ده‌بێته‌وه و دانوستانه‌کانیش له‌م باره‌وه تا ئێستا ئه‌رێنین.
Your Comment