بەپێی هەواڵی کوردپرێس، ئه‌نجوومه‌نی نیشتمانیی کوردی سووریا (ENKS) له ڕێگه‌ی فه‌یسه‌ڵ یووسف-ی گوته‌بێژییه‌وه هه‌ڵوێستی خۆی به‌رانبه‌ر به به‌شداری له ڕێوڕه‌سمی ڕاگه‌یاندنی حکوومه‌تی ڕاگوزه‌ری سووریا که بڕیار وایه سبه‌ی شه‌ممه له لایه‌ن ئه‌حمه‌د شه‌رع، سه‌رۆکی قۆناغی ڕاگوزه‌ر ڕابگه‌یه‌نرێت، ئاشکرا کرد.
وتەبێژی ئه‌نه‌که‌سه ڕایگه‌یاندووه، سه‌ره‌ڕای ئه‌وه‌ی بانگهێشتنامه‌یان پێ گه‌یشتووه، به‌ڵام به‌شداریی له ڕێوڕه‌سمه‌که ناکه‌ن به‌هۆی ئه‌وه‌ی سه‌رکردایه‌تی نوێی سووریا له باره‌ی پێکهێنانی ئه‌و حکوومه‌ته هه‌ماهه‌نگ نه‌بووه و ڕاوێژی پێ نه‌کردوون.
فەیسەڵ یووسف ده‌ڵێت، هێزه سیاسییه کوردییه‌کان نوێنه‌رایه‌تیی ڕاسته‌قینه‌ی گه‌لی کورد ده‌که‌ن و به‌رگریکاریی ڕاسته‌قینه‌ین، به‌ڵام له به‌رژه‌وه‌ندییاندا نییه به ته‌نیا بینه‌ر بن و ڕۆڵیان له به‌دیهێنانی مافه‌کانی کورددا نه‌بێت.
وتەبێژی ئه‌نجوومه‌نی نیشتمانیی کوردی سووریا گوتووشیه‌تی، هیواخواز بوون به‌ڕێوه‌به‌رایه‌تیی نوێی سووریا گرنگیی به مافه‌کانی کورد بدات وه‌کوو دووه‌م گه‌وره‌ترین نه‌ته‌وه‌ی ئه‌و وڵاته و دان به مافه‌کانیدا بنێت و به‌شداریی له بونیاتنانه‌وه‌ی وڵات بکات.
وتەبێژی ئه‌نه‌که‌سه ڕوونیشی کردووه‌ته‌وه، به‌ڕێوه‌به‌رایه‌تیی سووریای نوێی له‌باره‌ی به‌شداریی هه‌ر لایه‌نێکی دیکه‌ی کورد و ئاستی به‌شداریی نوێنه‌رایه‌تیی کورد له‌و حکوومه‌ته و ده‌سته‌به‌رکردنی پشک و مافه‌کانی کورد تێیدا، هیچ گفتوگۆیه‌کیان له‌گه‌ڵ نه‌کراوه.
Your Comment