بەپێی هەواڵی کوردپرێس، شاسوار عەبدولواحید، لە کۆنگرەیەکی ڕۆژنامەوانیدا ڕایگەیاند، ئه‌گه‌ر تا ڕۆژی چوارشه‌ممه‌ی داهاتووی په‌رله‌مانی کوردستان کۆ نه‌بێته‌وه ئه‌وا محه‌مه‌د سلێمان که سه‌رۆکی کاتیی په‌رله‌مانه ده‌ست له کار ده‌کێشێته‌وه و سەرۆکایەتی دانیشتنەکانی پەرلەمانی کوردستان ناکات.
ناوبراو ئاماژەی بەوەش کرد، پێشتر شاندی یەکێتی و دووجاریش شاندی پارتی سەردانی جووڵانەوەکەیان کردوە بە مەبەستی بەشداری کردن لە پێکهێنانی حکوومەتی هەرێمی کوردستان و پارتی ئامادەیی دەربڕیوە شەش وەزارەت بداتە جووڵانەوەکە، بەڵام ئەوان به‌شداری حکوومه‌تێک ناکه‌ین که ده‌سه‌ڵاتیان نه‌بێت.
شاسوار عەبدولواحید باسی ده‌ستپێشخه‌ریەکی بۆ حزبەکانی هەرێمی کوردستان، جگە لە پارتی ڕاگەیاند و دەڵێت: "هەر حزبێک دەیەوێت پۆستی سەرۆک وەزیران بۆ پارتی نەبێت، ئەوا دەتوانێت زۆرینە پەرلەمانی کۆ بکەنەوە و کاندید بۆ ئەو پۆستە پێشکەش بکەن، ئێمەش وەک هەر ۱۵ پەرلەمانتارەکەی نەوەی نوێ ئامادەین پشتوانی لێبکەین، بەبێ ئەوەی یەک پۆست و وەزارەتمان بوێت".
ناوبراو ئەوەشی خستەڕوو، ئەوان بەمجۆرەی ئێستا ئامادەنین بەشداری پێکهێنانی حکوومەتی هەرێمی کوردستان بکەن و وەک ئۆپۆزسیۆن دەمێننەوە، ئەگەر داواکانیان جێبەجێ نەکرێت.
Your Comment