بەپێی هەواڵی کوردپرێس، هونه‌رمه‌ندی ده‌نگخۆشی موکریان و شاری مه‌هاباد، (ئیبراهیم که‌ریم عه‌بدولڕه‌حمان عه‌بدولقادر)ه ، نازناوی هونه‌ریی (ئیبراهیمی قادری)یه و دایکی ناوی (سه‌یزاده ئه‌مین سه‌یدقادر)ه، له گوندێکی هه‌ڵکه‌وته‌ی نێوان دوو شاری (مه‌هاباد و بۆکان) که مێژوویه‌کی زۆر جوانیان هه‌یه و زاده‌ی گه‌وره هونه‌رمه‌ندانی گەورەی کوردن، هونه‌رمه‌ند ئیبراهیمی قادری له گوندی (عیسا که‌ند) له ساڵی ۱۳۱۳ی هەتاوی له خانه‌واده‌یه‌کی جووتیاری خانه‌دان و هونه‌ر دۆست چاوی بە دنیا هەڵهێناوە.
ئەم هونه‌رمه‌ندە خاوه‌نی ٦ برا و ٢ خوشکه، له ته‌مه‌نی هه‌رزه‌کاریدا له سۆز و خۆشه‌ویستی دایک و باوکی بێبه‌ش ده‌بێت و دایکی پێشتر کۆچی دوایی ده‌کات، له ساڵی ١٩٥١زاینی باوکیشی کۆچی دوایی دەکات و ئیبراهیمی گه‌نج و شۆخ و شه‌نگ ڕووبه‌ڕووی تاڵ و سوێرییه‌کان و شه‌ونخونی ژیان ده‌بێته‌وه.
له‌به‌رئه‌وه‌ی له گونده‌که‌یان قوتابخانه نه‌بووه، هونه‌رمه‌ند له‌و به‌هره‌یه بێ به‌ش ده‌بێت و به‌ڵام ماوه‌ی دووساڵ خراوه‌ته (حوجره) له‌لای مه‌لا خوێندوویه‌تی.
هونه‌رمه‌ند به‌حه‌سره‌ته‌وه باس له‌و به‌هره‌یه ده‌کات که‌لێی بێ به‌ش بووه‌و دەڵێت: "نه‌متوانی ده‌رس بخوێنم و له‌و نیعمه‌ته گه‌وره‌یه بێبه‌ش بووم، به‌ڵام فێری خوێندن و نووسین بووم، له ژیانی هونه‌ریمدا هه‌رچه‌نده نه‌خوێنده‌وار بووم، به‌ڵام هه‌موو کات حه‌زم به‌قه‌ڵه‌م و کاغه‌ز ده‌کرد، پێم خۆشبوو که‌له‌گه‌ڵ پیاوی گه‌وره‌ی خوێنده‌وار و ئاشنا به‌ئه‌ده‌ب تێکه‌ڵاو بم و زۆر له مه‌جلیسیاندا دانیشتووم و چێژم لێوه‌رگرتوون".
Your Comment