بەپێی هەواڵی کوردپرێس، ئەمڕۆ یەکشەممە، وەزارەتی کارەبای عێراق ڕایگەیاند، کۆماری ئیسلامیی ئێران بە هۆی نۆژەنکردنەوەوە، هەناردەکردنی غازی بۆ عێراق ڕاگرتووە کە بە هۆیەوە بەرهەمهێنانی ۵۵۰۰ مێگاوات لە کارەبای بەغدا و ناوەڕاستی عێراق لەدەستدراوە.

وەزارەتی کارەبای عێراق ڕوونیشیکردەوە کە کارەکانی نۆژەنکردنەوە ۱۵ ڕۆژ دەخایەنێت و وەزارەتەکەشیان بۆ قەرەبووکردنەوەی ئەو کارەبایەی لەدەستچووە، هەماهەنگی لەگەڵ وەزارەتی نەوتی عێراق دەکات.

بە پێی ڕێککەوتنی پێشووی نێوان هەردوولا، دەبوو ئێران ڕۆژانە ۲۵ ملیۆن مەتر سێجا لە ڕۆژێکدا بۆ عێراق هەناردە بکات، بەڵام ئەمڕۆ حەوت ملیۆن نێردراوە.

وەزارەتی کارەبا داواشی لە هەموولایەک کرد دۆخەکە لەبەرچاوبگرن تا ئەو کاتەی کارەکانی نۆژەنکردنەوەی سیستمەکەی ئێران کۆتاییان دێت و ئاستی هەناردەکردن ئاسایی دەبێتەوە.