بەپێی هەواڵی کوردپرێس، سه‌رۆکایه‌تی هه‌رێم له ڕاگه‌یه‌نراوکه‌دا بڵاوی کرده‌وه "سه‌رکۆنه‌ى سووتاندنى قورئانى پيرۆز ده‌که‌ين، کارێکى ته‌واو ناڕه‌وايه و ده‌بێته هۆى په‌ره‌سه‌ندنی ڕق و کينه و هه‌ڕه‌شه له پێکه‌وه‌ژيان و ئاشته‌وایی ده‌کات".
بڵاویشی کرده‌وه: "ده‌بێ ڕێز له بيروباوه‌ڕ و هه‌ستى ئايينى و پيرۆزييه‌کانى هه‌موو ئايين و ئايينزاکان بگيرێت و ڕێگه نه‌درێت له‌لایه‌ن هیچ که‌س و لایه‌نێکه‌وه ئازادی بقۆزرێته‌وه بۆ بێڕێزیکردن به پیرۆزییه‌کانی ئایین".
ڕۆژی چوارشه‌م پەنابەرێکی به‌ڕه‌گه‌ز عێراقی به‌ناوی (سه‌لوان مۆمیکا) لە وڵاتی سوێد هه‌ڵسابوو بە بێرێزیکردن و سووتاندنی قورئانی پیرۆز لە بەردەم مزگەوتێکی شاری ستۆکهۆڵمی پایته‌خت، ڕووداوه‌که کاردانەوەی توندی لەنێو وڵاتانی ئیسلامی دروست کرد و زۆرێک له وڵاتان سه‌رکۆنه و ئیدانه‌ی کرده‌وه‌که‌یان کرد.
لای خۆشیانه‌وه هه‌ریه‌ک له سه‌رۆک بارزانی و مه‌سرور بارزانی سه‌رۆکی ئه‌نجوومه‌نی وه‌زیرانی هه‌رێمی کوردستان به فه‌رمی سه‌رکۆنه‌ی کرده ناڕه‌واکه‌یان کرد و جه‌ختیان کرده‌وه که بێڕێزیکردن و سوتاندنی قورئانی پیرۆز دژی گیانی تەبایی و پێکەوەژیانە و خزمەتی گوتاری تاریکی و بڵاوکردنەوەی ڕق و کینە دەکات و لەسەر هەموولایەک پێویستە ڕێگری لێ بکەن.
Your Comment