بەپێی هەواڵی کوردپرێس، ئایەتۆڵڵا عەباس عەلی سولەیمانی نوێنەری پێشوتری ئایەتوڵڵا عەلی خامنەیی ڕێبەری باڵای شۆڕشی ئیسلامیی ئێران لە سیستان و بەلووچستان و ئەندامی ئێستای ئەنجومەنی شارەزایان لە شاری بابلسەر لە کاتی ئامادەبوونی لە لقێکی بانکی نیشتمانی دەستڕێژی گوللـە کراو و بەوهۆیەوە گیانی لەدەست دا.
یەکێک لە شایەتحاڵەکان ڕایگەیاند، "عەباس عەلی سولەیمانی لە بانکەکەدا دانیشتبوو، پێدەچێت هێرشبەرەکە دەمانچەی پاسەوانی بانکەکەی بردبێت و تەقەی لێکردبێت، بەداخەوە گیانی لەدەست داوە و سێ کەسی دیکەش کە لەگەڵیدا بوون برینداربوون".
ڕوحوڵا سەلگی یاریدەدەری سیاسی و ئەمنی و کۆمەڵایەتی پارێزگای مازەندەران هەواڵی تیرۆرکردنی ئایەتۆڵڵا سولەیمانیی پشتڕاست کردەوە و ڕایگەیاند: "بەرەبەیانی ئەمڕۆ ئایەتوڵڵا عەباس عەلی سولەیمانی لە هێرشێکی چەکداریدا کوژراو و هێرشبەرەکەش دەستگیرکرا".
Your Comment