بەپێی هەواڵی کوردپرێس، مەزڵووم کۆبانی، فەرماندەی گشتیی هێزەکانی سووریای دیموکرات (SDF) لە گوتارێکی ڤیدیۆییدا باسی لە وردەکارییەکانی هێرشی درۆنیی رۆژی هەینی بۆ سەر فڕۆکەخانەی سلێمانی کرد و گوتی: "لەدوای ئەوەی کۆبوونەوەکانمان لەگەڵ هاوبەشەکانمان لە شەڕی دژی داعش لە شاری سلێمانی کۆتایی هات، دوای نیوەڕۆ کاتێک دەگەڕاینەوە، ئەو کاروانەی ئێمەی تێدابوو، هاوبەشە ئەمریکییەکانمان و هێزی دژەتیرۆریشی تێدابوو. ئەوکاتە درۆنی چاودرێریی تورکیا هاتنە شوێنەکە، بەڵام هێرشەکەیان بێ ئەنجام بوو و شکستی هێنا".

لەبارەی ئامانجی پشت هێرشەکە، فەرماندەی گشتیی هەسەدە چەند خاڵێک باس دەکات، یەکەم "دەوڵەتی تورکیا بەم هێرشانە دەیەوێت ئەم شەڕە هاوبەشە کە ئێمە لەگەڵ هاوبەشەکانمان دەیکەین، چ هاوبەشە هەرێمییەکانمان، هێزە کوردستانییەکان، دەوڵەتی عێراق بێت، یانیش هاوبەشە نێودەوڵەتییەکانمان بێت، دەیەوێت شکست بەم تێکۆشانە بهێنێت. دەوڵەتی تورکیا بەو شەڕەی ئێمە لەگەڵ هاوبەشەکانمان بەیەکەوە لەدژی داعش دەیکەین، رازی نییە و بۆ ئەوەی گورزی لێ بووەشێنێت و ئاستەنگی بۆ دروست بکات، هەر شتێک لە دەستی بێت، دەیکات".

وەک مەزڵووم کۆبانی دەڵێت دووەم ئامانجی تورکیا ئەمەیە کە: "تورکیا بە پەیوەندییەکانمان لەگەڵ هێزە کوردستانییەکان سەخڵەت بووە. هەر شتێکیش کە لەدەستی بێت، دەیکات بۆ ئەوەی گورز لەم پەیوەندییانە بدات و نەیهێڵێت".

مەزڵووم کۆبانی رەتی دەکاتەوە تورکیا هیچ کام لەو ئامانجانەی پێکابێت و دەڵێت: "دەتوانین بڵێین دەوڵەتی تورکیا و حکوومەتی ئەردۆغان بەم هێرشانە ئامانجەکانی نەپێکا" هۆکارەکەشی بۆ ئەوە دەگەڕێنێتەوە کە "ئەم هێرشە دەنگدانەوەی زۆری هەبوو و ناڕازی بوونێکی گەورەی لەدژی هەبوو".

فەرماندەی گشتیی هەسەدە دەشڵێت: ئەمە جاری یەکەم نییە تورکیا ئەوان بە ئامانج دەگرێت و "دەشزانین کە ئەمە دواجاریش نابێت. بۆیە بە گەلەکەمان و دۆستەکانمان رادەگەیێنین؛ تێکۆشانمان بۆ پاراستنی دەستکەوتەکانی شۆڕشی باکوور و رۆژهەڵاتی سووریا رژدتر دەبێت و هەرگیز هێرشی لەمجۆرە نابنە هۆی وەستاندنی ئەم تێکۆشینەمان".