بەپێی هەواڵی کوردپرێس، ژماره‌یه‌ک ئه‌ندامی په‌رله‌مانی کوردستان ئه‌مڕۆ له کۆنگره‌یێکی رۆژنامه‌وانیدا له‌باره‌ی خۆپیشاندانه‌کانی پارێزگای سلێمانی هه‌ڵوێستی خۆیان ئاشکرا کرد و پشتیوانی خۆیان بۆ خۆپیشانده‌ران راگه‌یاند.
به‌یاننامه‌ی په‌رله‌مانتاران له‌لایه‌ن ئاشنا عه‌بدوڵا، ئه‌ندامی فراکسیۆنی گۆڕان خوێنرایه‌وه و تیایدا هاتووه: داوا ده‌که‌ن رێگه نه‌دان خۆپیشاندانه‌کان سه‌ر بکێشێت بۆ توندوتیژی، به‌ڵام ده‌ڵێن، "ئێمه‌ی په‌رله‌مانتارانی کوردستان وێڕای سوور بوونمان له‌سه‌ر یه‌کده‌نگی و به‌رگری کردن له مافه ره‌واکانی خه‌ڵکی کوردستان و پێداگیرمان له‌سه‌ر باش کردنی ژیان و گوزه‌رانیان و هه‌روه‌ها چاره‌سه‌رکردنی قه‌یرانی مووچه‌ی مووچه‌خۆرانی هه‌رێمی کوردستان به‌م راگه‌یه‌ندراوه هه‌ڵوێستی خۆمان ده‌خه‌ینه‌ڕو".
ئاماژه به‌وه‌ش کراوه، "سه‌ره‌ڕای ئه‌وه‌ی ده‌سه‌ڵاتدارانی هه‌رێم خه‌مساردن له چاره‌سه‌رکردنی ئه‌و قه‌یرانه دروستکراوه‌ی خۆیان بوونه‌ته ئه‌ندازیاری دروست کردنی و هه‌رێمی کوردستانی نغرۆی کاره‌ساتی گه‌وره‌ی دارایی و ئابووری کردووه، که‌چی هێشتا به‌رده‌وامن له برسی کردنی خه‌ڵک و ناشه‌فافییه‌تی داهاته‌کانی نه‌وت و شاردنه‌وه‌ی گرێبه‌سته‌کان و قاچاخچێتی له سنووره‌کاندا".
سەرچاوە: خەندان
کۆدی هەواڵنێر: 60113
Your Comment