«کۆفان کەنعۆ» سەرۆکی پارتی ڕۆژی دیموکراتی کوردستانی سووریا لە گفتوگۆ لەگەڵ کوردپرێسدا ئاماژەی دا بە سەرهەڵدانەوەی ناکۆکییەکان لەنێوان پارتی کرێکارانی کوردستانی تورکیا و پارتی دیموکراتی کوردستانی عێراق و وتی: دوژمنانی گەلی کورد هەر کات بیانەوێت یاریێکی نوێ دەست پێبکەن، ڕەوتە کوردییەکان لەدژی یەکتر هەڵدەخڕێنن تاکوو بە پێکدادن بەستێن بۆ لاواز کردنیان فەراهەم بکەن.
ناوبراو درێژەی دا: ئەمە بۆ ئێمە زۆر دڵتەزێنە کە ناکۆکییەکان لەنێوان دوو حزبی سەرەکی لە کوردستاندا کە لایەنگری زۆریشیان هەیە سەریهەڵداوەتەوە و بوو هۆی پێکدادان لەنێوانیاندا.
سەرۆکی پارتی ڕۆژی دیموکراتی کوردستانی سووریا زیاتر وتی: پرسی کورد بووەتە بابەتێکی جیهانی و ئەم دوو حزبە لەبری پێکدادان پێویستە بەدوای مافی کوردەکاندا بن و خۆیان لەشەڕی دوور بگرن.
کۆفان کەنعۆ وتیشی: لەحاڵێکدا مەترسیی گرووپە بناژۆخوازەکان لەناوچەکەدا دەبینرێت و بەشێوەی ڕاستەوخۆ هەڕەشە لە کورد دەکەن و تورکیاش بۆ دژایەتی کردنی کورد کەڵکیان لێوەردەگرێت؛ باشتر وایە گرووپە کوردییەکان بیر لە یەکگرتن بکەنەوە و هاوشێوەی ئەوەی لە کۆبانی و شەنگالدا کرا هاوکاریی یەکتر بکەن.
ناوبراوا وەبیری هێنایەوە: جیاوازیی سیاسی پرسێکی سروشتییە بەڵام نابێت ببێتە دوژمنی کردنی یەکتر و ئەم دوو حزبەیش باشتر وایە گفتوگۆ بکەن.
سەرۆکی پارتی ڕۆژی دیموکراتی کوردستانی سووریا جەختی کردەوە: پێویستە پێش هەموو شتێک هەم پارتی و هەم پەکەکە واز لە شەڕی میدیایی بێنن چوونکە بەستێن بۆ شەڕی سەربازی فەراهەم دەبێت.
کۆدی هەواڵنێر: 60113
Your Comment