کوردپرێس:

بافڵ تاڵه‌بانی، هاوسه‌رۆكی یه‌كێتی لە مەکتەبی سیاسی لە ھەولێر له‌گه‌ڵ جەیمس جێفری نێردەی تایبەتی سەرۆکی ئەمریکا بۆ هاوپەیمانیی نێودەوڵەتی دژی داعش و نوێنەری تایبەتی ئەمریکا بۆ کاروباری سووریا كۆ بوونه‌وه‌، له‌و كۆبوونه‌وه‌یه‌دا دواین پێشھات و گۆڕانکارییە سیاسی و ئابووری و ئەمنییەکان خرایە بەرباس و بۆچوونیان لەبارەوە خرایە ڕوو.

بافڵ تاڵەبانی بەڕاشکاوی سیاسەت و ستراتیژی یەکێتی بۆ دۆخی سیاسی و ئەمنی ھەرێم و عێراق و سووریا و ناوچەکە خستەڕوو، تەئکیدی لە سیاسەتی ھاوسەنگ و ھەماھەنگی و ھاریکاری ھاوبەشکردەوە، لەپێناو سەقامگیری سیاسی لە ناوچەکە بەمەرجێک بەرژەوەندییە باڵاکانی گەلی کوردی تێداپارێزراو بێت.

لەبارەی پەیوەندییەکانی ھەولێر و بەغدا و کێشە کەڵەکەبووەکان، ھاوسەرۆکی یەکێتی دووپاتی لەخواستی حیزبەکەی کردەوە بۆ چارەسەرکردنی کێشەکان لەسەر بنەمای دەستوو و رایگەیاند ھەموو ھەوڵێکی یەکێتی روو لە سیاسەتی شەراکەتی راستەقینە و ھاوبەشە کە بەرژەوەندییەکانی ھەردوولا تێیدا پارێزراوبن.

سەبارەت بە مەترسییەکانی داعش وپاشماوەکانی تیرۆریستان بافڵ تاڵەبانی پێویستی بەردەوامی و ھەماھەنگی زیاتری ھەمەلایەنەی نێوان ھێزەکانی ھەرێمی کوردستان و ھاوپەیمانان کردەوە و داوایکرد ھاوکارییەکان زیاتربکرێت بۆ ھێزی پێشمەرگە لەرووی پێداویستی سەربازی و مەشق و راھێنانەوە ئەم ھەنگاوەشی بەھۆکاری بەرقەرارکردنی ئارامی و ئاسایشی زیاتر وەسفکرد.

ھەر لە دیدارەکەدا ھاوسەرۆکی یه‌كێتی تەئکیدی لەبەردەوامی پشتیوانییەکانی ئەمریکا و پەرەپێدانی پەیوەندییەکان لەھەموو ئاستەکان کردەوە

لەبەرامبەردا جەیمس جێفری سوپاس یەکێتیی نیشتمانیی کوردستانی کرد کە ھاوکارو پشتیوانێکی سەرەکی بووە لەشەڕی رووبەڕووبوونەوەی داعش و تەئکیدی کردەوە لەبەردەوامی پشتیوانییەکانی وڵاتەکەی بۆ ھێزی پێشمەرگە و ھێزەکان لە عێراق و سوریا بەو پێیەی شەڕی تیرۆر کۆتایی نەھاتووە