کوردپرێس، ده‌قی وه‌ڵامه‌که‌ی ده‌زگای رۆشنبیری و راگه‌یاندنی پارتی بۆ به‌رپرسانی په‌که‌که بڵاو دەکاتەوە:
ماوەیێکە ھاوسەرۆکانی کەجەکە و موراد قەرەیلان و دۆران کاڵکان، دەستیان کردووە بە بەخشینەوەی تۆمەت بۆ پارتی دیموکراتی کوردستان و داوای ئەوەش دەکەن کە پارتی وەڵامیان بداتەوە.. لێره‌وه ده‌ڵێین: بەو سیاسەته چەوته‌ی هه‌تانه یارمەتی زەق و دیاری ئەو لایەنانە دەدەن کە دەیانەوێ دەستکەوتەکان لەناو ببه‌ن، کۆیلایه‌تی لە هەموو دونیا باوی نەماوە لە ناو په‌که‌که‌نه‌بێت، سیستەمی پەروەردە کردن و راهێنانتان خەڵکی ئازاد و دەنگ دلێر بەرهەم ناهێنێ، چوونکە ناهێڵن ئاگایان لە رووداو و گۆڕانگاری و پێشکەوتنەکانی دونیا بێ، تەنیا فێری ئیتاعە و تەنفیزی ئەوامریان دەکەن، کێ لەناو ئێوه‌دا دەتوانێ بۆچوونی هەبێ و کێيش دەتوانێ لەگەڵ بۆچوونی پەکەکە نەبێ و کام ئه‌ندامه‌تان دەتوانێ له ریزه‌کانی په‌که‌که جیاببێتەوە؟ نه‌ک هه‌ر ئه‌وه‌نده ته‌نانه‌ت سەرکردەکانی پەکەکەش خۆیان کردووەتە کۆیلەی هەندێ بۆچوون و پیرۆزیان کردووە، داوامانه سەرهەڵبڕن و چاو و مێشکتان بکەنەوە، جیهان گۆڕاوە لەو چاڵ و کون و ژێرزەمینە تاریکانە وەرنە دەرەوە، تێدەگەن کە چەندە لە ژینگەی خەڵکی کوردستاندا نامۆن.
زۆربەی حزبه کوردییه‌کان لە مەترسییەکان تێدەگەن و هەوڵ دەدەن رێگای چارەسەری و پشتیوانی دەستەبەر بکەن و رێگا بدۆزنەوە، بۆ ئه‌وه‌ی تەحەدیاتەکان زیانیان پێ نەگەیەنێ و زیان بە نەتەوە و نیشتیمانیش نەگات و هەگبەی بەرەنگاری پڕبێت، بۆیە مامەڵە لەگەڵ رووداو و پێشهاتەکان بەواقیع بینییەوە دەکەن نەک وەک په‌که‌که، که به‌هۆی سیاسه‌تی شاش و هه‌ڵه‌کانیانه‌وه، تا ئێستاش خەڵکی کوردستان نازانێ چیان دەوێ و بۆچی کوڕ و کچی کورد بەکوشت دەدەن و بەردەوام بەپێچەوانەی شەپۆلەکان مەلە دەکەن؟ وەک مەوجێک لە نێو بازنەیێکی داخراو و خەرقی نێو نەخۆشی فکری لە مێدیاکان قسە دەکەن، کەچی بە زمانێکی جەھل و نەخوێندەوارانە ھێرش دەکەن و به وشەکانیان و دابڕاویان لە تێگەیشتنی سەردەم، دەناسرێنەوە.
ئێستا نیه که راگه‌یاندنه‌کانی په‌که‌که شه‌ڕ به پارتی ده‌فرۆشن و خه‌ریکی بڵاو کردنه‌وه‌ی چه‌واشه‌کاری و تۆمه‌ت هه‌ڵبه‌ستنن، به‌ڵام که کار گه‌یشته ده‌ستبردن بۆ مێژوو و سه‌روه‌ریه‌کانی پارتیمان و شکۆ و ده‌ستکه‌وته‌کانی گه‌لی کوردستان له‌لایه‌ن هاوسه‌رۆکان و سه‌رکردایه‌تی په‌که‌که‌وه، بێگومان بێ وه‌ڵام نابین و رووی راسته‌قینه‌تان ده‌رده‌خه‌ین و پێتان ده‌ڵێن: سەیری خۆتان کردووە لەکوێ هاتوون و ئێستاش لە کوێن و بۆچی دروست بوون و ئێستا خه‌ریکی چین؟ سەیر خۆتان کردووە چۆن بوونەتە کەواسووری بەرلەشکر و دەستی ئەم و ئه‌و رادەکێشن بۆ تێکدان و ئاستەنگ دروست کردن بۆ ئاینده و ده‌ستکه‌وته‌کانی ئەو بەشانەی کوردستان کە بە دەریایێک خوێن و خەبات بەدەست هاتوون؟ کەی خەڵکی هەرێم له کۆن و نوێدا داوای لە ئێوە کردووە یان پێشبینییان لێتان هەبووە بێن بۆ پاڵیشتیان؟ لەو کاتەوەی که حزبه‌که‌تان دروست بووه هەوڵ دراوه مه‌دارتتان بکه‌ن، کەچی له به‌رامبه‌ردا وڵامتان لوتژەنین بووە لە ورد و درشتی ئەم وڵاتە و سەدەها گوندتان پێ چۆڵ کردوون! دوێنێ و پێرێ بوو لە ده‌ڤه‌ری سیدەکان بە پێشمەرگە ئازا و چاونەترسەکانی کوردستانتان ده‌گوت نابێ بێنە ئێرە، لاتان ئاساییه سه‌ربازانی تورک بێن، بەڵام نابێ پێشمه‌رگه‌کانی کوردستان بێنه ئه‌و خاکه‌ی که هی خۆیانه، ئەوەیه وڵاتپارێزیه‌که‌ی په‌که‌که!..
بەردەوام گەف و هەڕەشە و گوڕەشەکانتان بەلێدوانی زۆر گرنگ دەزانن، چوونکە تەسەورێکتان بۆ خۆتان دروست کردووە (ته‌سه‌ورێکی دوور لە راستی و بێ هیچ بنەمایێکی لۆژیکی) کە ناسنامەی کوردایەتی و نیشتمان په‌روه‌ری لە گیرفانی ئێوە دایە! ناسنامەی دڵسۆزی و تێکۆشانیش لە گیرفانی ئێوە دایە و پارادایمی ئێوە پیرۆزە هی خەڵکی تر نەخێر!... جا ئێستا باش گوێ رادێرن (هەرچەند لەلای سەرکردەکانی په‌که‌که ته‌نیا ناردن هەیە و وەرگرتن نییە)، کوردی ئەم هەرێمە لەسەرەتای دامەزراندنی دەوڵەتی عێراق دوو ساڵ مقاوەمەی کرد و سلێمانی و کەرکووک و هەولێر و مووسڵ نەبوونە بەشێک لەو دەوڵەتە و دوای ئەوەش که بەزۆرداری و بەبێ ئیڕادەی خەڵکی کوردستان ئەم بەشەی کوردستان لکێندرا بە عێراقەوە، مەرجی پاراستنی مافەکانی کوردی تێدا ئیجبار کرا، ساڵی 1930 کە بڕیار بوو عێراق سەربەخۆیی وەرگرێت مەرجی بۆ دانرا کە مافی کورد تێیدا پارێزراو بێ، ساڵی 1958 کە رژێم لە پادشایی گۆڕا بۆ سیستمی کۆماری، لە دەستووری ئه‌وکاتی عێراقدا چه‌سپا که عه‌ره‌ب و کورد شەریکن لەم وڵاتەدا. هه‌روه‌ها ساڵی 1970 له رێکه‌وتنی یانزه‌ی ئاداردا ئۆتۆنۆمی بۆ کوردستان ئیقرارکرا و ساڵی 1992 پەرلەمانی کوردستان بڕیاری فیدراڵی ده‌رکرد و ساڵی 2003 کە رژێمی بەعس رووخا لە دەستووری نوێی عێراقدا مافی کوردان لە عێراق تۆمارکرا، ئه‌مانه هەمووی به‌رهه‌می خوێن و قوربانی و بەرخودان و شۆڕشەکان و گیان فیدایی شێخ عەبدولسەلام بارزانی و شێخ محمودی مەلیکی کوردستان و شۆڕشەکانی بارزان و شۆڕشی مه‌زنی ئەیلول و گوڵان بوون و له کاتێکدابوون که هێشتا په‌که‌که لە دایک نەببوو یا زۆر ساوا بوو، ئێوە چی دەزانن لە مێژووی نەتەوەکەمان؟
پێناسه‌ی نیشتمانپه‌روه‌ری بۆ ئێمه مه‌که‌ن! نیشتمانپەروەره‌کان ئەوانە بوون کە بە خەنجەر هێرشی سەر دەبابەیێکی دوژمنیان دەکرد، ئەوانەبوون که قاچی خۆیان به سه‌نگه‌ره‌کانی به‌رگرییه‌وه ده‌بەسته‌وه تا شەهید بوون شەریان دەکرد، ئه‌و قاره‌مانانه‌بوون که به ساچمەزەن و تاپڕ و هەندێ جاریش بە دەستی بەتاڵ رووبەڕووی دوژمن ده‌وه‌ستانه‌وه، نیشتمانپەروەره‌کان ئەو کوردانە بوون که لە بیابانه‌کانی باشووری عێراق دەست و پێیان زنجیر کرابوو و ئامادە نەبوون داوای لێبوردن له داگیرکا‌ر بکەن، ئەوانە بوون کە لە زیندانە تاریک و بێ ئامانه‌کانی نگرە سەلمان و «قصرولنهایە» گیرکرابوون، ئەوانە نیشتیمانپەروەر بوون که ئەنفال و کیمیاباران و کوشتاری بەکۆمەڵ نەیترساندن، ئەوانە نیشتیمانپەروەر بوون کە "زەعیم صدیق" لە ساڵێ 1963 لە پارکی ئازادیی ئێستادا و له ناوچه‌قی شاری سلێمانی زیندەبەچاڵی کردن.. ئێوە لەکوێ بوون؟
باسی دڵسۆزی ده‌که‌ن؟! دڵسۆزانی ئێمه ئەوانە بوون قوت و خواردنی ماڵ و منداڵیان پێشکەشی پێشمەرگە دەکرد، ئەو دڵسۆزانه بوون کە بەرۆژ کرێکارییان دەکرد و بەشەویش نەیاندەهێشت دوژمن ساتێک پشوو بدات، ئەوانە دڵسۆز بوون که زەبروزەنگی حکوومەتە یەک لە دوایەکەکانی عێراق و تانک و تۆپیان نەیترساندن، ئەوانە دڵسۆز و کوردپەروەر و نیشتیمانپەروەر بوون کە سه‌ربه‌رزانه وتیان ئێمە پێشمەرگەین هەتا ماوین لە ژین، خوایە وەتەن ئاواکەی و ئەی رەقیب هەر ماوە قەومی کورد زوبانیان کرده وێردی سه‌ر زمانیان، له‌وکاتانه په‌که‌که لە کوێ بوو؟ کۆڵ نەدان و چۆک دانەدان و خۆ نه‌چه‌ماندن و سەندنی ماف، تێکۆشانی ئەم خەڵکە بووە، ئه‌م هەرێمه پارادایمی خۆی پەیڕەو کراو دەکا و دەسکەوتیشی بۆ نەتەوە و نیشتمان هەبووە، با پارادایمی ئێوە بۆ خۆتان بێ..
داوای وه‌ڵام ده‌که‌ن! وەڵامی چیتان بدەنەوە کە بوونە هۆکاری سەرئێشە بۆ هەموو کوردستان، لە هەر به‌شێکی کوردستان ئاسۆیێک پەیدابێ خۆتانی تێهەڵدەقورتێنن و هەوڵی تێکدانی دەدەن! ناشێ چاوه‌ڕێ بن پێتان بڵێین لەگەڵ ئەو سیاسەتە چەوت و نالۆژیکیەی ئێوەداین، بیرتان دێنینه‌وه که سه‌رکردایه‌تی و خەڵکی هەرێمی کوردستان لە هیچ کەس و لایه‌نێکی قبووڵ ناکه‌ن بەرە و ئاڕاستەیێکی نادیار و ئاینده‌یێکی ناڕۆشن ببردرێن، ئێوە تێر نەبوون ئەوەندەی بوختان و چەواشەکاری بە خەڵکی کوردستان بکەن.
ئێوە دەتانەوێ پاساو بۆ شکسته سیاسی و عەسکەری و دیپلۆماسیه‌کانتان بدۆزنەوە، ویژدان لای سەرکردایەتی په‌که‌که باری کردووە و خه‌ریکه خۆتان ده‌که‌نه وانه‌بێژی ئه‌خلاق! با ئێمه پێتان بڵێن بێ ئه‌خلاقی چیه: دروست کردنی کێشه و هه‌وڵدان بۆ له‌ناوبردنی بەری رەنجی دەیان ساڵەی تێکۆشانی هەرێمی کوردستان بێ ئه‌خلاقییه، بێ ئەخلاقی ئەوەیە ماڵ و موڵکی خەڵکتان داگیر کروە و سەدان گوندتان وێران کردووه، بێ ئەخلاقی ئەوەیە بڵێی با سه‌ربازانی تورک بێن بەڵام نابێ پێشمەرگە بێنه ئه‌و ده‌ڤه‌ره! هه‌ڵخه‌ڵه‌تاندنی منداڵی کوڕ و کچی ئەم وڵاتە و بەکوشتدانیان بۆ پاراستنی سنووری دەوڵەتان بێ ئه‌خلاقیه... ده‌ڵێن چەک دانانێین، پێمان ناڵێن لە هەرێمێکی ئازادکراودا چەکتان بۆ چییە و لەگەڵ کێ شەڕ دەکەن؟ یاخود ته‌نیا بۆ راکێشانی دەستی سوپای تورکیایه به بیانووی ئه‌وه‌ى ئێوه شەڕکه‌رن.. پێمان ناڵێن ڤێتنامەکەتان چی لێ هات؟ چەک دادەنێن یا داینانێن پەیوەندی بە هەرێمی کوردستانەوە نییە، ئه‌وه‌ی په‌یوه‌ندی به ئێمه‌وه هه‌یه رێگانیشاندانتانه بۆ ئه‌وه‌ی بچنه‌وه سەر موڵک و ماڵیی خۆتان و ئەو شوێنەی بۆی دروست بوون و لێوەی هاتوون.
ئێوه که ده‌ڵێن تورک هاتووە و شەڕ دەکات بۆ قڕکردنی کوردان، بۆیه لە هەفتەنین و زاپ و خواکوڕک بەرخودان دەکەین! ئەی لەخۆتان نەپرسیووە یا خەڵکی کوردستانی تورکیا و هەرێمی کوردستان لە ئێوە ناپرسن باشە بۆ تا په‌که‌که هەڵنەهات و مەیدانی خۆی چۆڵ نەکرد و ڕای نەکردە هەرێمی کوردستان، سوپای تورکیا بۆ بستێک نەهاتبووە نێو خاکی هەرێمەوە؟ له راستیدا ئێوە پاساوەکەن و ئێوە دەست کێشەکەن به‌ڵکوو هه‌ر بۆ ئه‌وه لێره‌ن تا تورک بێتە هەرێم، خۆ مێژوو شەرم لەکەس ناکات و چەندین که‌ستان لەناودا ئاشکرا بوون که کار بۆ میتی تورکی دەکەن، بۆیه له په‌نای تۆمه‌تی کارکردن بۆ میتی تورکی بوختان بۆکه‌س هه‌ڵمه‌به‌ستن، ئاشکرایه کارکردن بۆ میتی تورکی لەبەر په‌که‌که بەرکەس ناکەوێ، فه‌رموون ئەوە لێدان و سووتاندنی شوێن و ئۆتۆمبیله‌کانتان، ئایا پارتی و یەکێتی یا حزبەکانی دیکە لەناو ئێوەدان و خەبەر ده‌ده‌نه فڕۆکه‌کانی تورکیا یان هه‌ر بۆخۆتانن و له پاڵ ئه‌وه‌شدا هاووڵاتیانی مه‌ده‌نی هه‌رێمی کوردستان ده‌که‌نه قوربانی و ره‌ز و باخه‌کانیان ده‌سووتێنن. هەموو کەس باسی کوردایەتی بکات ئێوە نا، چوونکە باشمان له یاده کە باسی چارەنووس و سەربەخۆیی کرا دۆڕان کاڵکانتان چەنده تووڕە بوو و چەندین وتاریشتان لەسەر پاراستنی سنووری ئەو وڵاتانە نووسی و گوتتان ئێمە کێشەمان لەگەڵ بارزانی ئەوەیە داوای سەربەخۆیی دەکات، گوتتان نابێ دەوڵەتی کوردی دروست ببێ...
خۆشبه‌ختانه له هه‌رێمی کوردستان سۆز و تێگه‌یشتنێکی زۆر بۆ بارودۆخی پارچه‌کانی دیکه‌ی کوردستان هه‌یه، ئێوه ئه‌وه‌تان قۆستووه‌ته‌وه و له هه‌موو روێکه‌وه سنووره‌کان ده‌به‌زێنن، چوونکه له راستیدا خاوه‌ن ئامانجێکی روون نین بۆ قه‌زیه‌ی کورد و کوردستان، بۆیه نه‌ک هه‌ر سنوور به‌زاندن به‌ڵکوو ره‌فتاری دیکه‌شتان لێده‌وه‌شێته‌وه به‌رامبه‌ر به هه‌رێمی کوردستان و ده‌ستکه‌وته‌کانی و لایه‌نێکی خودان قه‌زیه‌ی ره‌وا و هه‌ر بۆ ئه‌وه‌ش هاتوون.
خاتوو بەسێ هۆزاتی هاوسه‌رۆکتان، لە لایێک دەڵێ پارتی دەستی لەگەڵ تورک تێکەڵاو کردووە بۆ قڕکردن و پارتی ئەخلاقی نییە و پارتی ویژدانی نییە و ...هتد! هه‌رخۆشی لەلایێکی دیکه‌دا دەڵێ پێویستە پارتی بە دەوڵەتی تورک بڵێت: کە دەبێت بە رێگای دیموکراتی کێشەکان لەگەڵ کورد چارەسەر بکات و مافی گەلی کورد لە کوردستانی تورکیا بدەن..! پێتان ده‌ڵێین ئه‌و پارتیه‌ی که ئێوه به‌و زمانه نزمه‌تان تۆمه‌تی بۆ هه‌ڵده‌به‌ستن، زۆر هەوڵی دا و دەوڵەتی تورکیش نەرم بوو و باسی چارەسەری ئاشتیانەش کرا و له دڵی ئامەده‌وه گوترا کێشەیێک هەیە بەناوی کێشەی کورد و دەبێ چارەسەر بکرێ، تا گەیشتە گفتوگۆی ناڕاستەوخۆ ئینجا گفتوگۆی راستەوخۆ و دواتر قسەکردن لەگەڵ بەڕێز ئۆجەلان لە ئیمڕاڵی و تا گفتوگۆکانی ئه‌ورووپاش چوو، دروست له‌وکاته‌دا په‌که‌که غروور گرتی و بێ ئاگابوو له‌وه‌ی پێشڤه‌چوونه‌کان به‌رهه‌می فشار و رێزی هەوڵەکانی جەنابی سەرۆک بارزانی و نێچیرڤان بارزانی و رەحمەتی مام جەلال-ن نه‌ک هه‌ڵه به‌رده‌وامه‌کانی په‌که‌که.. ئێوه به سیاسه‌تی چه‌وت و چالاکیه نا مرۆڤانه و نا دیموکراسییه‌کان و نه‌بوونی هیچ روئیایێک واتان کردوه وڵاتانی دونیا زیاتر گویێ لە قسەکانی خەڵکی وەکوو باخچەلی بگرن، که ئه‌مه‌ش به‌رهه‌می هه‌ڵه‌کانی خۆتانه، سه‌باره‌ت به ئەمه‌ریکا و وڵاتانی دیکەش چ بڕیارێک دەدەن ئه‌وان خۆیان لێی بەرپرسن..
له‌باره‌ی شنگالیشه‌وه جارێکی دیکه بیرتان دێنینه‌وه که شنگال بەشێکی دانەبڕاوی خاکی کوردستانە و لە هەموو ئه‌و گفتوگۆیانه‌ی که لەگەڵ حکوومەتە یەک لەدوای یەکەکانی عێراق کراوە هەرده‌م سوور بووین لەسەر ئەم پرەنسیپە و بەردەوامیش دەبین، کەچی ئێوە تازه به‌تازه له کوردستانی داده‌بڕن، ئاخر ئه‌وه چ لۆژیکێکه که ئێمەی خەڵکی شنگال شەرعیەتمان نییە، بەڵام ئەوانی لە شوێنی دیکە هه‌ڵاتوو و پەنابەر شەرعیەتیان هەیە! ئەمە لە کوردەواریدا پێی دەڵێن رووی دەوێ ئەمما رووی قایم.. هەموو ئەو ناوانەی دروستتان کرد شەرعیەتیان نییە نەک ئەوان بەڵکوو ئێوەش شەرعیەتتان لە هەرێمی کوردستان نییە بۆ دەستوەردان لە کاری ئیداری و حوکمڕانی و سەربازیی، تەنیا حکوومەتی هەرێم و وەزارەتی پێشمەرگە نەبێت، جا چ کەسی دیکە وا دەڵێت یا وای گوتووە لە مسداقیەتی ئەم بابەتە ناگۆڕێ.
لە کۆتایی دا دەڵێین: تکایە ئەگەر قسەتان کرد ئەوەندە درێژەی مەدەنێ یا بە کوردیەکەی درێژ دادڕی مەکەن تا ئێمەش ناچار نەبین ئەوەندە وەڵامتان بدەینەوە کە ئیدی پێڕانەگەن چۆن ماسکی سەر رووخسارتان ببەستنەوە، پارتی دیموکراتی کوردستان وەک حزبێکی جەماوەری خاوەن قەزییە لە ناوچەکەدا، روئیا و پەیامی خۆی لە چوارچێوەی سیاسەتێکی لۆژیکانە لەسەر قەزیەی کورد لە بەرگێکی شەرعی و یاساییدا پێشخستووە و پێشی دەخات، ئێوەش خەریکی خۆتان بن و دەست لەم چیرۆکە بەتاڵانە ھەڵگرن، چوونکە ئەم شانۆیەی کە ئێوە دەیگێڕن دەمێکە بینەری لە نێو کوردان نەماوە، پێویستە خۆتان بگۆڕن و بەخەبەر بێنەوە.
کۆدی هەواڵنێر: 60113
Your Comment