بەپێی هەواڵی کوردپرێس، ئەمڕۆ چوارشەممە ژمارەیێک لە مامۆستایانی ئاینی لە هەولێر گردبوونەوە و داوا لە ئەنجومەنی وەزیرانی هەرێمی کوردستان دەکەن بە زووترین کات بڕیاری دەستپێکردنەوەی وتاری هەینی بدەن.

عوسمان کانی کوردەیی لەو گردبوونەوەیەدا بە هەواڵنێرانی وت وتی: ئەمڕۆ مامۆستایانی ئاینی کە جگە لە هێمنی و ئارامی هیچ شتێکی دیکە لەسیمایاندا نەبووە، گردبوونەوە و بە داخەوە لە لایەن هێزێکی ئاسایشەوە هێرشکرایە سەر مامۆستایانی ئاینی و چەندین کەسێک دەستگیرکراوە و ڕێگری لە گردبوونەوەکەمان کراوە.

لای خۆیەوە پۆلیسی هەولێر قسەکانی عوسمان کانی کوردەیی، پەرلەمانتاری کۆمەڵ لە پەرلەمانی عێراق رەت دەکاتەوە کە وتبووی لە گردبوونەوەی ئەمڕۆی ژمارەیێک لە مامۆستایانی ئایینیدا لە مزگەوتی سەوافی هەولێر، هێرشی کراوەتە سەر و پاسەوانەکەی و چەند مامۆستایێکی ئایینی دەستگیرکراون.

بەڕێوەبەرایەتی پۆلیسی پارێزگای هەولێر، لەمبارەوە لە روونکردنەوەیێکدا رایگەیاند "سەبارەت بەو لێدوانەی ئەمڕۆی مامۆستا عوسمان کانی کوردەیی کە ڕایگەیاندووە، گوایە لەلایەن هێزەکانی پۆلیس و ئاسایش لێیدراوە و خەڵک دەستگیر کراوە، لێرەوە بەپێویستی دەزانین بۆ هەموو لایێکی ڕوون بکەینەوە، ئەو قسانەی ناوبراو هیچ بنەمایێکی ڕاستی نییە و بەهیچ شێوەیێک هیچ کەسێک دەستگیر نەکراوە و نە ئەو مامۆستا بەڕێزە و نە کەسانیتریش دەستیان بۆ نەبراوە".

پۆلیسی هەولێر وتوشیەتی "ئەوەی ڕوویداوە ئەم مامۆستا بەڕیزانە بەبێ مۆڵەت گردبوونەوەیان ئەنجام داوە و رێنماییەکانی خۆپارێزی لە ڤایرۆسی کۆرۆنایان پێشێل کردوون و لەلایەن هێزەکانی پۆلیس بەشێوازێکی زۆر یاسايی و مەدەنیانە بەپێی ڕێنماییەکانی وەزارەتی تەندروستیی هەوڵیانداوە بۆ خۆپارێزی لە فایرۆسی کۆرۆنا بڵاوەیان پێبکرێ".

پۆلیسی هەولێر دوپاتیکردۆتەوە کە "هەمو بەڵگەو وێنەو ڤیدۆکان لە بەردەستن کە هیچ کەس دەستگیرنەکراوە و کەسیش دەستی بۆ نەبراوە، هەموو ئەوەشی لەوبارەیەوە دەگوترێ دوورن لەڕاستی و بەهەموو شێوەیێک قسەکانی ئەو مامۆستا بەڕێزە ڕەت دەکەینەوە".

کۆدی هەواڵنێر: 60113