بەپێی هەواڵی کوردپرێس، بڕیاردەری لیژنەی دارایی لە پەرلەمانی عێراق، دكتۆر ئەحمەد سەفار، بۆ ماڵپەڕی فەرمیی پارتی دیموكراتی كوردستان رایگەیاندووە: "چوونی شاندی كوردی بۆ بەغدا، ھەنگاوێكی گرنگە بۆ ئەوەی پەلە بكرێت لە چارەسەركردنی كێشەكان و ھەنگاوی باشیش نراوە لە چارەسەركردنی كێشەكان، بۆیە بەردەوام دەبن تا دەگەنە رێككەوتن".

سەفار باسی لەوەش كرد: "پێویستە پەلەی لێ بكرێت و زیاتر كات نەكوژن و رێككەوتن واژۆ بكەن و ئەمجارە كە چوونە بەغدا بە بێ رێككەوتن نەگەڕێنەوە، بۆیە چاوەڕێ دەكرێت بگەنە رێككەوتن".

ناوبراو گوتیشی: "پێشبینی دەكەین ئەمجارە بگەنە رێككەوتن و كۆتایی بەو كێشانە بێنن كە لە نێوانیاندا ھەن، چوونكە پێویستە بەغدا مووچەی ھەرێمی كوردستان رەوانە بكات".

لای خۆشیەوە ، سەرۆكی فراكسیۆنی پارتی دیموكراتی كوردستان لە پەرلەمانی عێراق ڤیان سەبری رایگەیاند، ھەرێم و بەغدا مەبدەئییەن گەیشتوونەتە رێككەوتن و تەنھا ماوە لەسەر وردەكارییەكان رێككەوتن بكەن، بۆیە كە چوونە بەغدا، ھەوڵی رێككەوتن دەدرێت.

سەبری گوتیشی، ھەردوو لا ئامادەییان نیشان داوە بۆ چارەسەركردنی كێشەكان.

کۆدی هەواڵنێر: 60113