بەپێی هەواڵی کوردپرێس، نێچیرڤان بارزانی سه‌رۆکی هه‌رێمی کوردستان له په‌یامێکدا بڵاوی کردوه‌ته‌وه: رووداوی به‌ئازار و دڵته‌زێنی ئاگرکه‌وتنه‌وه‌ی شه‌وی رابردوو له نه‌خۆشخانه‌ی ئیبن ئه‌لخه‌تیبی تایبه‌ت به نه‌خۆشه‌کانی کۆرۆنا له به‌غدا که تیایدا ده‌یان که‌س گیانیان له ده‌ست دا و بریندار بوون هه‌موومانی هه‌ژاند.
ناوبراو ئاماژه‌ى به‌وه‌ش داوه: هه‌رێم به هه‌موو شێوه‌یێک ئاماده‌ی هه‌موو هاوکارییێکی پێویسته و نه‌خۆشخانه‌کانی به ته‌واوی ئاماده‌ن بۆ پێشوازی کردن له بریندارانی روداوه‌که و پێشکه‌ش کردنی هه‌موو چاودێرییێکی پزیشکی پێویست.
سه‌رۆکی هه‌رێم جه‌خت له‌وه‌ش ده‌کاته‌وه، ده‌بێت لایه‌نه په‌یوه‌ندیداره‌کان هۆکاره‌کانی که‌وتنه‌وه‌ی ئاگره‌که ئاشکرا بکه‌ن و لێپێچینه‌وه له هه‌ر که‌مته‌رخه‌مییه‌کدا بکرێت و له هه‌موو شوێنێک ئه‌وپه‌ڕی رێکاره‌کانی سه‌لامه‌تی بگیرێنه‌به‌ر بۆ ئه‌وه‌ی جارێکی دیکه رووداوێکى دڵته‌زێنى له‌و شێوه‌یه له هیچ شوێنێکی وڵات دووباره نه‌بنه‌وه.
کۆدی هەواڵنێر: 60113
Your Comment