کوردپرێس:
ئاژانسی ڕۆیتەرز نووسیویەتی کۆنگرێسمان لیندسی گراهام ڕۆژی چوارشەمە 4ی تەمووز لەگەڵ ئەردۆغان دیداری کردووە و لەو دیدارەدا سەبارەت بە پێشڕەویی زیاتری تورکیا لە نێو خاکی سووریا هۆشداری بە ئەردۆغان داوە ئەوەش پاش ئەوە دێت کە ئەو کونگرێسمانە شاری مەنبەج و هێزەکانی یەپەگەی بەسەر کردبووەوە.
گراهام کە هاوکات ئەندامی لیژنەی هێزی چەکداری کۆنگرێسی ئەمریکایە لە پشکی کۆمارییەکان بە ڕۆیتەرزی وتووە دەبێت تورکیا پشتگیریی ئەمریکا بکات بۆ مانەوە لە سووریا.
ناوبراو بە ئەردۆغانی وتووە باشتر وایە ئەمریکا لە سووریا بمێنێتەوە چوونکە کشانەوەی ئەمریکا لە سووریا ئەنجامی باشی نابێت.
لیندسی گراهام لە سەردانەکەی خۆی بۆ مەنبەج بەڵێنی بە هیزی کوردی ئەو ناوچەیە دابوو کە گەڕایەوە ئەمریکا قەناعەت بە دۆناڵد ترەمپی سەرۆکی ئەو وڵاتە بهێنێت هێزی ئەمریکی لە سووریا بمێنێتەوە.
ناوبراو سەبارەت بە ڕێککەوتنی ئەمریکا و تورکیا لە سەر ئەوەی هێزی کوردی یەپەگە مەنبەج چۆڵ بکات وتوویەتی دوورکەوتنەوەی یەپەگە تا مەودای 20 کیلۆمەتریی مەنبەج کەفایەت ئەکات.
گراهام پاش سەردانەکەی سووریا و تورکیا ئێستا لە بەغدایە.
Your Comment