بەپێی هەواڵی کوردپرێس، ئەمڕۆ دووشەممە 06-04-2020 وەزارەتی تەندروستیی هەرێمی کوردستان راگەیێندراوێکی نوێی بڵاوکردەوە و رایدەگەیێنێت، 41 کەس کە پێکهاتوون لە 17 ئافرەت و 15 پیاو و 9 منداڵ تووشی ڤایرۆسی کۆرۆنا بوون.

بەپێی راگەیێندراوەکەی وەزارەتی تەندروستیی هەرێمی کوردستان، "دوو لە تووشبووەکان لە قەزای سۆران و سێ لە ناحیەی سیدەکان و یەک لە گوندی ھەڵەجەی بچووکە، ئەوانی دیکە لەناو شاری ھەولێرن و زۆربەی زۆریان بەرکەوتەی تووشبووەکانی ھەردوو پرسەی ماتەمینی گەڕەکی کارێزانی شاری ھەولێرن. دووی دیکە پێشینەی گەشتیان ھەبووە".

سامان بەرزنجی، وەزیری تەندروستیی هەرێمی کوردستان لەدوای تۆمارکردنی ئەو 41 تووشبووەی کۆرۆنا لە سنووری پارێزگای هەولێر رایگەیاند "هەرێمی کوردستان لەبەردەم مەترسییێکی گەورە و کارەساتی مرۆیی دایە".

کۆی گشتیی تووشبووان لە هەرێمی کوردستان بۆ 277 کەس بەرزبووەوە، 88 کەسیان چاک بوونەتەوە و 3 کەسیش گیانیان لەدەست داوە.

کۆدی هەواڵنێر: 60113