بەپێی هەواڵی کوردپرێس، سەباح هەورامی، بەڕێوەبەری گشتیی تەندروستیی سلێمانی، لە کۆنگرەیێکی رۆژنامەوانیدا رایگەیاند: "بەداخەوە ئەمڕۆ هاوڵاتییێکی دیکە لە شاری سلێمانی گیانی لەدەست دا، دوای ئەوەی کە کۆچی دوایی کردووە نموونەمان لێوەرگرتووە و دەرکەوتووە هەڵگری ڤایرۆسەکەیە."

بەڕێوەبەری تەندروستیی سلێمانی ئاماژە بەوەش دەدات، زۆربەی زۆری نەخۆشەکانی کۆرۆنا لە سلێمانی تەندروستییان زۆر باشە، تەنیا یەک کەس نەبێت کە لەژێر چاودێری وردی پزیشکیدایە.

ئەوەش سێیەم حاڵەتی گیان لەدەستدانە بە ڤایرۆسی كۆرۆنا، دوای ئەوەی لەماوەی بڵاوبوونەوەی ڤایرۆسەكەدا كەسێک لە سلێمانی و یەكێكی دیكەش لە چەمچەماڵ كە هەڵگری ڤایرۆسەكە بوون گیانیان لەدەست دا.

کۆی گشتیی تووشبووانی ڤایرۆسی کۆرۆنا لە هەرێمی کوردستان 215 تووشبوو لەو ژمارەیە 74 کەس چاک بوونەتەوە و 3 کەسیش گیانیان لەدەست داوە.

کۆدی هەواڵنێر: 60113