کوردپرێس:

ڕۆژی 25ی ڕەشەمەی 1398 سی و دوو ساڵ بە سەر کیمیاباران کردنی هەڵەبجەدا تێدەپەڕەێت کە لەو کارەساتەی سەردەمی ڕژێمی بەعسدا زیاتر لە 5 هەزار مرۆڤی بێتاوانی دانیشتووی هەڵەبجە کرانە قوربانی.

مەسروور بارزانی سەرۆکی حکوومەتی هەرێمی کوردستان لە یادی سی و دوو ساڵەی کیمیابارانی هەڵەبجەدا پەیامێکی بڵاو کردۆتەوە کە ئەمە دەقی پەیامەکەی سەرۆکی حکوومەتی هەرێمی کوردستانە:

ئەمڕۆ 32 ساڵ بەسەرکیمیاباران و کۆمەڵکوژی شاری هەڵەبجە تێدەپەڕێت کە بەشێک بوو لە سیاسەتی قڕکردن و جینۆسایدکردنی گەلی کوردستان. ئەم تاوانە گەورەیەی بەرامبەر نەتەوەکەمان ئەنجامدرا، زامێکی قووڵە لە مێژووی گەلی کوردستاندا و هێمای ئەو ستەمکاریی و زۆردارییەیە کە بەرامبەر گەلی کوردستان کرا.

حکوومەتی هەرێمی کوردستان کە بەرهەمی خوێنی شەهیدان و خۆڕاگری میللەتەکەمانە، هەموو هەوڵێک دەخاتەگەڕ بۆ خزمەتکردنی زیاتری کەسوکاری شەهیدان و ئەنفالکراوان. ئەم بیرئانینە تراژیدیایانەش پێویستە هاندەری زیاترمان بن بۆ یەکڕیزی و یەکگرتوویی و کارکردنی هاوبەش لە پێناو زاڵبوون بە سەر هەموو کارەسات و دۆخێکی سەختدا .

سەری رێز و نەوازش بۆ گیانی پاکی شەهیدانی هەڵەبجە و گشت شەهیدانی کوردستان .

مەسروور بارزانی

سەرۆکی حکوومەتی هەرێمی کوردستان

2020/3/16