بەپێی هەواڵی کوردپرێس: دەزگای راپرسیی پۆلیمەترێ-ی تورکی، ئەوکاتەی هەڵبژاردنی شارەوانییەکان لە ئیستانبۆڵ دووبارە کرایەوە، ئەو دەزگایە ئاشکرای کرد، کە ئەمجارەیان ئەکرەم ئیمامئۆغڵو بە رێژەی یەک ملیۆن دەنگ بە پێش بیناڵی یڵدرم دەکەوێت، هەرواش دەرچوو و ئیمامئۆغڵو بەو رێژە زۆرە بە پێش رکابەرەکەی یلدرم کەوت و بووە سەرۆکی شارەوانیی ئیستانبۆڵ.

ئەو دەزگایە دەنگی پارتە سیاسییەکانی تورکیا بە بەراورد بە هەڵبژاردنی پەرلەمانی ٢٠١٨ هەڵسەنگاندووە. بە گوێرەی هەڵسەنگاندن و ئەنجامی راپرسیی ئەو دەزگایە، ئاکەپە رێژەی دەنگەکانی بۆ ٣٠٪ بەرز دەبێتەوە، لە کاتێکدا لە ٢٠١٨ ئاکەپە ٤٠٪ی دەنگەکانی تورکیای بەدەست هێناوە.

مەهەپە کە پارتێکی ناسیۆنالیستی تورکیایە و دژی کوردە و هاوپەیمانی ئاکەپەیە، بە گوێرەی ئەنجامی راپرسیی پۆلیمەترێ بێت، ئەگەر بەیانی هەڵبژاردنی پەرلەمانی لە تورکیا ئەنجام بدرێت، مەهەپە ناتوانێت بەربەستی هەڵبژاردن بشکێنێت و دەنگەکانی بۆ ٨.٩٪ کەم بووەتەوە.

بەڵام هەدەپە کەلە ٣ هەڵبژاردنی پەرلەمانی تورکیادا توانی بەربەستی هەڵبژاردن بشکێنێت، دەنگەکانی بە رێژەیێکی کەم زیاد دەکات و دەتوانێت بە ئاسانی بەربەستی هەڵبژاردن بشکێنێت، ئەویش بە هێنانی ١٢.٨٪ ی دەنگەکان لە تەواوی تورکیادا.

هەر ئەو دەزگایە ئاشکرای دەکات، کە هاوپەیمانی کۆماری لە نێوان ئاکەپە و مەهەپە، رێژەی دەنگەکانیان دەگاتە ٣٩٪، بەڵام هاوپەیمانی میللەت و پارتەکانی تری ئۆپۆزسیۆن دەنگەکانیان بۆ ٦٠٪ بەرز دەبێتەوە، ئەمەش دەریدەخات کە لە هەڵبژاردنی داهاتوو ئاکەپە زۆرینە لە دەست دەدات، تەنانەت ئەگەر مەهەپەش هاوپەیمانی بێت.

کۆدی هەواڵنێر: 60113