به‌پێی هه‌واڵی کوردپرێس، تورکیا و ویلایەتە یەکگرتووەکانی ئەمریکا لە بەیاننامەیێکی هاوبەشدا رایانگەیاندوووە: لە کۆبوونەوەکەی رۆژی هەینی ئه‌نقه‌ره‌دا لەبارەی نەخشە رێگەیێک بۆ هەماهەنگی و هاوکاری لە مەنبەج، گەیشتوونەتە رێککەوتن، ئەمەش بۆ گرەنتی پاراستنی ئاسایش و سەقامگیری مەنبەج و باکووری سووریا.
هەروەها لە بەیاننامەکەشدا هاتوووە کە مەولوود چاووش ئۆغلۆ وەزیری دەرەوەی تورکیا، لە 4ی حوزەیراندا لەگەڵ مایک پۆمپیۆ وەزیری دەرەوەی ئەمریکا بۆ تاوتوێ کردنی هەمان مەبەست کۆ ببێتەوە.
پێشتر تورکیا لە چەندین بۆنەدا هەڕەشەی هێرش کردنەسەر شاری مەنبەج و دەرکردنی هێزەکانی سوریای دیموکراتی کردوووە کە ئەو هێزانە هاوپەیمانیی سەرەکی ئەمریکان لە سووریا، شاری مەنبەج و باکووری سووریاش هۆکارێکی سەرەکیی ناکۆکییەکانی نێوان ئه‌نقه‌ره و واشنتۆنە.
کۆدی هه‌واڵنێر: 60104
Your Comment