بێگەرد تاڵەبانی، سكرتێری پەرلەمانی كوردستان لەو بارەیەوە رایگەیاند: بەهۆی تەواونەبوونی راپۆرتی هەردوو لیژنەی یاسایی و دارایی لەسەر پرۆژەیاسای چاكسازی، دانیشتنەکەی دووشەمە 21ی 5ی 2018 پەرلەمان ناكرێت.

ناوبراو وتیشی: " بەهۆی تەواونەبوونی نیسابی یاساییەوە، كۆبوونەوەی هەردوو لیژنەی یاسایی و دارایی نەكراوە بۆ تەواوكردنی راپۆرتی هاوبەش، بۆیە دانیشتنی پەرلەمان دوا دەكەوێت و رەنگە بكەوێتە هەفتەی داهاتوو".

سكرتێری پەرلەمانی كوردستان راشیگەیاند: هەر كە كۆبوونەوەی پەرلەمان كرا، نامەی دەستلەكاركێشانەوەی یوسف محەمەد دەخرێتە بەرنامەی كارەوە.

لەلایەن خۆشییەوە، دلێر ماوەتی سەرۆكی فراكسیۆنی یەكێتی لەپەرلەمانی كوردستان، رایگەیاند: دوای كۆبوونەوەیێک لەپەسەندكردنی دەستلەكاركێشانەوەی د.یوسف محەمەد، دەبێت سەرۆكی نوێی پەرلەمان هەڵبژێردرێت، یاخود میكانیزمێكی دیكە دابنرێت بۆ ئەوەی ئەم چەند مانگە، پەرلەمانی كوردستان كارەكانی خۆی بەباشی ئەنجام بدات.