کوردپرێس:

نەریمان فازڵ، وتەبێژی بەڕێوەبەرایەتیی گەشتوگوزاری هەولێر (23ی ئازاری 2021) لەلێدوانێکی تەلەفزیۆنیدا رایگەیاند، لە چوار ڕۆژی ڕابردوو 34 هەزار گەشتیار هاتوونەتە پارێزگای هەولێر و بۆ ئەمڕۆش بەهۆی ئەوەی لەکاتژمێر 6:00ی بەیانی کە قەدەغەی هاتووچۆی شارەکانی باشور و ناوەڕاستی عیراق هەڵگیراوە، پێشبینی دەکرێت هاتنی گەشتیاران بۆ هەولێر و شارەکانی دیکەی هەرێمی کوردستان زیاد بکات.

وتیشى، رێنماییەکانی حکومەت و قەدەغەی هاتووچۆ هۆکارن بۆ کەمبوونەوەی گەشتیاران، بەو هۆیەشەوە بەراورد بە ساڵانی رابردوو، رێژەی هاتنی گەشتیاران لە عێراقەوە بۆ هەولێر بەڕێژەی 50٪ کەمی کردووە.

بەوتەى نەریمان فازڵ "لە جەژنی سەری ساڵ و لە زستاندا، هەندێک چالاکی لەو ناوچانە ئەنجامدرا کە بەفریان لێ دەبارێت، بۆیە لە زستانیش گەشتیارێکی زۆر سەردانی هەولێریان کردووە و بەگشتی لە سەرەتای ئەمساڵەوە نزیکەی 200 هەزار گەشتیار سەردانی هەولێریان کردووە".