به‌پێی هه‌واڵی کوردپرێس، ئه‌مڕۆ دووشه‌ممه 21ی ڕه‌شه‌مه به ئاماده‌بوونی دۆگلاس سیلیمان باڵوێزی ئه‌مریكا له عێراق، قوباد تاڵه‌بانی جێگری سه‌رۆک وه‌زیرانی هه‌رێمی کوردستان و به‌ڕێوه‌به‌ری ئاژانسی په‌ره‌پێدانی نێوده‌وڵه‌تی نووسینگه‌ی ئه‌و ئاژانسه له هه‌ولێر کرایه‌وه.
قوباد تاڵه‌بانی له كۆنگره‌یێكی ڕۆژنامه‌وانیی هاوبه‌ش له‌گه‌ڵ دوو به‌رپرسی ئه‌مریکا ڕای‌گه‌یاند: كردنه‌وه‌ی نووسینگه‌ی په‌ره‌پێدانی نێوده‌وڵه‌تی له هه‌رێم كارێكی هاوبه‌شی نێوان هه‌رێمی كوردستان- ئه‌مریكایه و به‌مه‌ش پشتیوانیی ئه‌مریكا بۆ هه‌رێم ده‌سه‌لمێنرێت و ئه‌مریكا پاڵپشتی هه‌رێم ده‌كات.
ناوبراو وتیشی: ئه‌و چاكسازییانه‌ی حكوومه‌تی هه‌رێم به‌نیازه بیانكات چاكسازیی ریشه‌یین و ته‌نها قسه نین.
قوباد تاڵه‌بانی جه‌ختی کرده‌وه: به‌رنامه‌یێک که جێبه‌جێ ده‌کرێت بۆ باشتربوونی دۆخی ئابووریی هاووڵاتییانه و ئه‌و به‌رنامه‌یه ڕێگریی له به‌فیڕۆ چوونی سه‌رمایه ده‌کات.
تاڵه‌بانی کردنه‌وه‌ی نووسینگه‌ی په‌ره‌پێدانی نێوده‌وڵه‌تیی ئه‌مریکا له هه‌رێم به ده‌رفه‌تێکی باش بۆ هه‌رێمی کوردستان وه‌سف ده‌کات و ده‌ڵێت: ئه‌مریکا له حکوومه‌تی هه‌رێمی کوردستان له چوارچێوه‌ی ده‌وڵه‌تی فیدڕاڵی عێراق پشتیوانی ده‌کات.
قوباد تاڵه‌بانی ئاماژه به‌وه‌ش ده‌کات که ده‌بێت هه‌ولێر و به‌غدا به گفتوگۆ و چاره‌سه‌ری كێشه‌كانیان لاپه‌ڕه‌یێکی نوێ هه‌ڵبده‌نه‌وه و جه‌ختی کرده‌وه: هیچ پاساوێک نه‌ماوه بۆ ئه‌وه‌ی به‌غدا مووچه‌ی فه‌رمانبه‌ران نه‌نێرێت و پێویسته ده‌ست به‌و پرۆسه‌یه بكات و پاراستنی ناوچه كێشه له‌سه‌ره‌كان له ئه‌ستۆی حكوومه‌تی عێراقدایه.
دواتر دۆگلاس سیلیمان باڵوێزی ئه‌مریكا له عێراق وتی: ئێمه پشتیوانی حكوومه‌ت و هاووڵاتییانی هه‌رێم ده‌كه‌ین و ئه‌م پرۆژه‌یه له زۆر بواردا هاوكاریی حكوومه‌تی هه‌رێم ده‌كات و تایبه‌ته به په‌ره‌پێدانی كه‌رتی ئابووری.
دۆگلاس سیلیمان له‌باره‌ی پێوه‌ندییه‌کانی نێوان هه‌ولێر- به‌غدا ڕای‌گه‌یاند هه‌ر دوو لا بۆ به‌رده‌وامیی گفتوگۆکانی نێوانیان هان ده‌ده‌ین.
هاوكات ویلیام پیته‌رسن به‌ڕێوه‌به‌ری ئاژانسی ئه‌مریكا ڕای‌گه‌یاند: ئه‌م پڕۆژه‌یه له سه‌رتاسه‌ری عێراق جێبه‌جێ ده‌كرێت و پڕۆژه‌كه گۆڕانكاری له ژیانی هاووڵاتییان و ئاستی خزمه‌تگوزاری ده‌كات و خولی به‌رز كردنه‌وه‌ی تواناكان بۆ باش كردنی ئیداریی و دارایی.
سه‌رچاوه: PUK media
کۆدی هه‌واڵنێر: 60103
Your Comment