به‌پێی هه‌واڵی کوردپرێس، جاسم محه‌مه‌د جه‌عفه‌ر که که‌سایه‌تییێکی نزیکه له حه‌یده‌ر عه‌بادی سه‌رۆک وه‌زیرانی عێراقه‌وه ده‌ڵێت: حکوومه‌تی فیدڕاڵ 4 مه‌رجی داناوه بۆ ئه‌وه‌ی گفتوگۆی نێوان به‌غدا و هه‌ولێر درێژه بدرێت و یه‌که‌میان دانپێدانانی هه‌ولێر به هه‌ڵوه‌شانه‌وه‌ی ده‌رئه‌نجامی گشتپرسی و ڕاوه‌ستاندنی هه‌موو هه‌وڵێک بۆ جیابوونه‌وه‌ی هه‌رێم له عێراقه.
جه‌عفه‌ر زیادیشی کرد: مه‌رجی دووهه‌م ئه‌وه‌یه هه‌رێمی کوردستان ئه‌و هه‌له بۆ حکوومه‌تی فیدڕاڵ بڕه‌خسێنێت تاوه‌کوو هه‌ندێک له پرسه ناکۆکه‌کان له‌گه‌ڵ هه‌ولێر چاره‌سه‌ر بکات له‌وان ده‌روازه مه‌رزییه‌کان، فڕۆکه‌خانه‌کان و پرسی نه‌وت.
ئه‌م نوێنه‌ره تورکمانییه هه‌روه‌ها ئاماژه به‌وه ده‌کات هه‌ر دوو ده‌روازه‌ی برایم خه‌لیل و فیشخابوور کێشه‌ی زۆریان هه‌یه و هێزی پێشمه‌رگه‌ش هێشتاکه له ناوچه کێشه‌له‌سه‌ره‌کان نه‌کشاوه‌ته‌وه و وتیشی: مه‌رجی سێهه‌می به‌غدا گه‌ڕانه‌وه‌ی نوێنه‌رانی په‌رله‌مانی کوردستان و وه‌زیرانی کورد بۆ سه‌ر کاره‌کانیان له هه‌ولێره و چواره‌مین مه‌رجیشی ئه‌وه‌یه ئه‌و لیژنانه‌ی هه‌رێمی کوردستان که بڕیاره سه‌ردانی به‌غدا بکه‌ن ده‌بێت له تێکڕای پارته سیاسییه‌کانی هه‌رێم پێکهاتبێت.
سه‌رچاوه: هه‌واڵده‌ریی "اسکای پرس"
کۆدی هه‌واڵنێر: 60103
Your Comment