به‌پێی هه‌واڵی کوردپرێس، به‌همه‌ن مورادنیا پارێزگاری کوردستان له دیداره‌که‌ی خۆی له‌گه‌ڵ وه‌زیری ڕێگاوبانی ئێراندا کێشه سه‌ره‌کییه‌کانی پارێزگای کوردستانی له که‌رتی ڕێگاوباندا باس کرد. گرینگترین ته‌وه‌ره‌کانی ئه‌و دیداره بریتی بوون له پڕۆژه نیوه‌چڵه‌کانی که‌رتی خانوبه‌ره، جاده، پێوه‌ندی و گواستنه‌وه، فڕۆکه‌خانه، هێڵی ئاسن و کۆنه ماڵه‌کانی نێو شاره‌کان.
مورادنیا هه‌ر له دیداره‌که‌دا ده‌ستپێکی کێشانی هێڵی ئاسن له هه‌مه‌دانه‌وه به‌ره‌و سنه‌ی باس کرد و وتیشی: به مه‌به‌ستی خێراکردنه‌وه‌ی پڕۆژه‌ی کۆریدۆری باکوور بۆ باشوور له پارێزگای کوردستان وه‌زیری ڕێگاوبان فه‌رمانی کردوووه له ماده‌ی 56ی ده‌ستووردا به‌شێک له شایسته‌داراییه‌کان بۆ ئه‌و بواره ته‌رخان بکرێت.
ناوبراو سه‌باره‌ت به کۆنه ماڵه‌کانی نێو شاریش وتی: پرۆژه‌ی نۆژه‌ن کردنه‌وه له چه‌ند گه‌ڕه‌کی کۆنی شاری سنه به‌م زووانه ده‌ست‌پێده‌کات.
کۆدی هه‌واڵنێر: 60104
Your Comment