بەپێی هەواڵی کوردپرێس، وه‌زیری پێشمه‌رگه له‌گه‌ڵ سه‌رجه‌م فه‌رمانده‌و جێگرانی لیواکانی سه‌ر به وه‌زاره‌تی پێشمه‌رگه کۆ بووەوە، له‌و کۆبوونه‌وه‌یه‌دا، که سه‌ربه‌ست له‌زگین، بریکاری وه‌زاره‌ت و فه‌ریق جه‌مال محمد سه‌رۆکی ده‌سته‌ی ئه‌رکان ئاماده‌بوون، وه‌زیری پێشمه‌رگه به فه‌رمانده‌یی لیواکانی راگه‌یاند: "به له‌خۆبردوویه‌وه ئه‌رکی خۆتان جێبه‌جێ بکه‌ن و ببنه پارێزه‌رێکی کاریگه‌ری پڕۆسه‌ی خۆرێکخستنه‌وه که به ئاراسته‌یێکی باش رۆیشتووه، هه‌روه‌ک روونی کرده‌وه گرنگیدان به پره‌نسیپه سه‌ربازییه‌کان و مه‌شق و راهێنانه‌کان له‌بنکه و یه‌که سه‌ربازییه‌کاندا".
له‌باره‌ی دۆخی ناوچه‌که و رووداوه‌کانی ئه‌م دوایه وه‌زیری پێشمه‌رگه ڕایگه‌یاند، ئه‌وان به‌و په‌ڕی بایه‌خه‌وه له سه‌قامگیری و ئاسایشی ناوچه‌که و هه‌رێمی کوردستان ده‌ڕوانن و دووپاتیشی کرده‌وه روانگه‌ی هێزه‌کانی پێشمه‌رگه پاراستنی خاکی وڵات و راوه دوونانی تیرۆریستان و پاراستنی ئاشتی و سه‌لامه‌تیه.
ناوبراو وتیشی: "رووداوه‌کانی ئه‌م دوایه، مه‌ترسی سه‌رهه‌ڵدانه‌وه‌ی داعش زیاتر ده‌کات و داواشی کرد رێگه نه‌ده‌ن تیرۆریستان ده‌رفه‌ته‌که بقۆزنه‌وه و دووباره سه‌رهه‌ڵبده‌نه‌وه".
وه‌زیری پێشمه‌رگه ئاماژه‌ی به‌وه‌ش دا "ئێمه له هه‌رێم له‌گه‌ڵ چاره‌سه‌ری ئاشتیانه و گفتوگۆی به‌رپرسیارانه داین، ده‌خوازین ئاگری ئه‌و رووداوانه زیاتر ته‌شه‌نه نه‌کات و هه‌موولایێک هه‌وڵی ئارامکردنه‌وه‌ی دۆخه‌که بده‌ن".
کۆدی هەواڵنێر: 60113
Your Comment