به‌پێی هه‌واڵی کوردپرێس، یووسف محه‌مه‌د سادق سه‌رۆكی په‌رله‌مانی كوردستان که له ئه‌ندامانی بزووتنه‌وه‌ی گۆڕانیشه، ڕای‌گه‌یاند: نامه‌ی ده‌ستله‌كاركێشانه‌وه‌م له پۆستی سه‌رۆكی په‌رله‌مان داوه‌ته ڕێكخه‌ری گشتیی گۆڕان و چاوه‌ڕێی هه‌ڵوێستی حزبه‌كه‌مم.
ئه‌وه له حاڵێکدایه له ماوه‌ی دوو ساڵ و نیوی ڕابردوودا پارتی دیموکراتی کوردستان به بۆنه‌ی ناکۆکیی سیاسی له‌گه‌ڵ بزووتنه‌وه‌ی گۆڕان ئیزنی چالاکی له پۆستی سه‌رۆکی په‌رله‌مانی به ناوبراو نه‌داوه و نه‌یتوانیوه بچێته ناو په‌رله‌مان.
ناوبراو له‌باره‌ی دۆخی ئێستای هه‌رێم و به‌رده‌وامیی قه‌یرانه‌كان جه‌ختی کرده‌وه: "پێویسته خه‌لكی كوردستان له ماوه‌یێكی نزیكدا خۆیان بۆ خۆپیشاندانێكی سه‌رتاسه‌ری ئاماده بكه‌ن بۆ هه‌ڵوه‌شاندنه‌وه‌ی حكوومه‌تی ئێستای هه‌رێم".
یووسف محه‌مه‌د داواشی كرد بۆ ئه‌وه‌ی خۆپیشاندانه‌كان به هێمنی و به بێ توندوتیژی به‌ڕێوه بچێت و پێویسته لیژنه‌یێكی باڵا بۆ سه‌رپه‌رشتی كردنی خۆپیشاندانه‌كه دروست بكرێت.
یووسف محه‌مه‌د سه‌باره‌ت به بژارده‌ی بوونه‌وه به ئۆپۆزسیۆن له‌لایه‌ن گۆڕانه‌وه ڕای‌ده‌گه‌یێنێت: "له ناو بزووتنه‌وه‌ی گۆڕاندا گفتوگۆ له‌باره‌ی بوونه‌وه به ئۆپۆزسیۆن ده‌كرێت به‌ڵام من پێموایه بوونه‌وه به ئۆپۆزسیۆن هیچ مانایێكی نه‌ماوه چوونكه حكوومه‌تێكی به‌رپرسیار نه‌ماوه تا ببینه ئۆپۆزسیۆن."
سه‌رچاوه: ڕادیۆ نه‌وا
کۆدی هه‌واڵنێر: 60103
Your Comment