کوردپرێس:

پاش ئەوەی کورتە فیلمێکی دۆکیۆمێنتاری لە بارەی هێرشی داعش بۆ سەر هەرێمی کوردستان و بەشداری کردنی ئێران لەو شەڕە و یارمەتیدانی بۆ هەرێمی کوردستان بڵاو کرایەوە نێچیرڤان بارزانی سەرۆکی هەرێمی کوردستان ڕوونکردنەوەی لەبارەی فیلمەکەوە بڵاو کردەوە و لای خۆیشیەوە مەسعوود بارزانی لەو بارەیەوە پەیامێکی بڵاو کردەوە کە لە کاتی شەڕی داعشدا سەرۆکی هەرێمی کوردستان و فەرماندەی گشتیی هێزەکانی پێشمەرگە بوو.

مەسعوود بارزانی لە پەیامەکەیدا باس لەوە دەکات کە لایەنێک بەتەنیا ناتوانێ داعش تێكبشكێنێت و ریشەكێشكردنی داعش هەماهەنگی و كاری هاوبەشی هەموو لایێم و كۆمەڵگەی نێودەوڵەتیی پێویستە.

سەرۆکی پارتی دیموکراتی کوردستان لە پەیامەکەیدا ئەوەشی زیاد کردووە: "هیچ كەس و لایەنێك ناتوانێ ئەو حەقیقەتە بشارێتەوە كە ئەفسانەی داعش لەسەر دەستی ڕۆڵە قارەمانەكانی گەلی كوردستان تێكشكا."

دەقی پەیامەكەی مەسعوود بارزانی:

بەناوی خودای مەزن و دلۆڤان

ماوەیەكە لەهەندێ ناوەندی ئیعلامی و سیاسی باسی شەڕی داعش دەكرێت. لێرەدا ڕاستییەك هەیە ناكرێ چاوپۆشی لێ بكرێ، داعش دیاردەیەكە كە دوژمنی سەرجەم مرۆڤایەتییە و، شەڕكردن لەگەڵ داعش شەڕێكی ئاسان نییە چونكە بەرەیێكی بەرفراوان و هەمەلایەنە و لایەنێكیش بەتەنیا ناتوانێ داعش تێكبشكێنێت. ریشەكێشكردنی داعش هەماهەنگی و كاری هاوبەشی هەموو لایێم و كۆمەڵگەی نێودەوڵەتیی پێویستە.

كاتی خۆی لە شەڕی داعشدا ئێمە سوپاسی هاوپەیمانان و ئەمەریكامان كرد كە یارمەتیی هێزی پێشمەرگەی كوردستانیان داوە. سوپاسی هەمو ئەو لایەنانەشمان كرد كە بەجۆرێك بەشداربوونە لە شەڕی داعش و یارمەتیی پێشمەرگەیان داوە. بەڵام لەگەڵ ئەوەشدا پێویستە هەمو لایەك ئەوە بزانن كە ئەوەی لەسەر ئەرزی واقعدا بە خوێن و قوربانیدانی خۆی، كوردستانی لە هەڕەشەی داعش پاراست، هێزی پێشمەرگەی كوردستان بوو. هیچ كەس و لایەنێك ناتوانێ ئەو حەقیقەتە بشارێتەوە كە ئەفسانەی داعش لەسەر دەستی ڕۆڵە قارەمانەكانی گەلی كوردستان تێكشكا.

مەسعوود بارزانی

27ـی كانوونی دووەمی 2021