به‌پێی هه‌واڵی کوردپرێس، ئیلهام ئه‌حمه‌د ئه‌ندامی ئه‌نجومه‌نی جێبه‌جێکاریی ئه‌نجومه‌نی دیموکراتی سووریا له لیدوانێکدا باس له نامه‌ی ئه‌مدواییه‌ی وه‌زاره‌تی ده‌ره‌وه‌ی سووریا بۆ ڕێکخراوی نه‌ته‌وه یه‌کگرتووه‌کان و تۆمه‌تبارکردنی سوپای سووریای دیموکرات به دابه‌شخوازی و داگیرکردنی ناوچه‌کانی سووریا ده‌کات و ده‌ڵێت: ئێمه تۆمه‌تگه‌لێکی وا ڕه‌ت ده‌که‌ینه‌وه. ئێمه هه‌میشه داوامان له ده‌وڵه‌تی ناوه‌ندیی سووریا کردووه که سیسته‌مێکی دیموکرات و پڕۆسه‌یێکی سیاسیی بگرینه به‌ر که بۆ هه‌میشه ئاشتی له سووریا جێگیر بکات.
ناوبراو له درێژه‌ی لێدوانه‌کانیدا ده‌وڵه‌تی ناوه‌ندیی سووریای بانگهێشتی دانوستان کرد و گوتی: بۆ چاره‌کردنی قه‌یرانی سووریا ده‌بێ پڕۆسه‌یێکی به‌ربڵاوی سیاسی ئه‌نجام بدرێت و له‌م پێناوه‌دا چه‌ندین جار داوای ده‌ست‌پێکردنی پڕۆسه‌یێکی وامان له دیمه‌شق کردووه. ئه‌نجومه‌نی دیموکراتی سووریا ئه‌زموونێکی باشی له ئیداره‌ی خۆسه‌ری باکووری وڵات هه‌یه و سوپای دیموکراتی سووریاش ڕاهێنانی سه‌ربازیی باشی بینیوه که ده‌توانین له‌گه‌ڵ ده‌وڵه‌تی ناوه‌ندیی سووریا به‌کاری ببه‌ین.
ئه‌حمه‌د جه‌ختی کرده‌وه: ئێمه هه‌ر کاتێک داوای ده‌ست‌پێکردنی پڕۆسه‌ی سیاسیمان له دیمه‌شق کرد تۆمه‌تگه‌لێکی جۆراوجۆر خرایه پاڵمان. ئه‌م ڕه‌فتاره هیچ خزمه‌تێک به پڕۆسه‌ی سیاسی و ئاشتی له سووریا ناکات. ده‌وڵه‌تی ناوه‌ندی بۆ کۆنتڕۆڵ‌کردنی تێکڕانی ناوچه‌کانی سووریا هه‌ڕه‌شه‌ی ئه‌نجامدانی ئۆپه‌راسیۆنی سه‌ربازی ده‌کات.
سه‌رچاوه: هه‌واڵده‌ریی هاوارنیووز
کۆدی هه‌واڵنێر: 60103
Your Comment