کوردپرێس:

ئێوارەی ڕۆژی سێشەمە 17ی ئەیلوولی 2019 بەرهەم ساڵح سەرۆک کۆمارى عێراق و نێچیرڤان بارزانى، سەرۆکى هەرێمى کوردستان جەختیان لە پتەوکردنى پەیوەندییەکانى هەولێر ـ بەغدا و بەردەوامیی گفتوگۆ بۆ چارەسەرکردنى کێشەکان لەسەر بنەماى دەستوور کردەوە.

لە کۆبوونەوەکەدا دەستەى سەرۆکایەتیی پەرلەمانى کوردستان، جێگرانى سەرۆکى هەرێمى کوردستان، جێگرى سەرۆک وەزیران و وەزیرى داراییی عێراق و ژمارەیێک لە بەرپرسانى حکوومەتى هەرێمى کوردستان ئامادەى بوون، گفتوگۆ لە بارەی پرسە گرنگەکانی نێوان حکوومەتی فیدراڵ و حکوومەتی هەرێمى کوردستان کرا، بەتایبەتی پرسەکانى بودجەى گشتیی ساڵى داهاتووى عێراق و ماددەى (140) و داڕشتنى یاساکان و هەڕەشە و مەترسییەکانى تیرۆ و توندڕەوى.

لە کۆبوونەوەکەدا هەردوولا جەختیان لە گرنگی پاراستنی یەکڕیزیى لایەنە کوردستانییەکان لە عێراق، کارى پێکەوەییان لەگەڵ هێزە عێراقییەکان، یەکدەنگى لەسەر پرسە چارەنووسسازەکان و برەودان بە پەیوەندییەکانی هەولێر ـ بەغدا کردەوە.

هەردوو لایەنی کۆبوونەوەکەش جەختیان لە گرنگیی پاراستنی یەکڕیزیى لایەنە کوردستانییەکان لە عێراق و هێزە عیراقییەکان و کارى پێکەوەییان و یەکدەنگى لەسەر پرسە چارەنووسسازەکان و برەودان بە پەیوەندییەکانی هەولێر ـ بەغدا کردەوە.