بەپێی هەواڵی کوردپرێس كۆتاییی ساڵی رابردوو دەمیرتاش لەمیانی چاوپێکەوتنێکدا لەگەڵ گۆڤاری ئێکسپرێس-ی مانگانەدا ڕایگەیاندبوو ئەو وتار و بابەتانەی لەناو زینداندا نووسیونی مانگی داھاتوو لە چوارچێوەی کتێبێکدا بڵاو دەکرێتەوە.

سەڵاحەدین دەمیرتاش كە ئێستا لە زیندانی ئەدرنەدایە لە تویتێكدا بڵاوی كردەوە، "سوپاسی بەڕێوەبەری هەدەپە و پارێزەرانم دەكەم بۆ ئەو گرنگی پێدانەیان بۆ كتێبی بیرەوەرییەكانم بە ناوی (سەحەر) ، لەراستیدا ئەم كتێبە ناوەڕۆكی خەباتی هەموومانی تێدا نووسراوە".

ئاماژەی بەوەش كردووە، "ئەو هاوكاری و گرنگی پێدانەتان بە كەسایەتیی من نرخێكی دیموكراتییە، بۆیە من زۆر بەواتا و بەنرخ دەیبینم".

لە رۆژی چواری مانگی تشرینی دووەمی ساڵی رابردووەوە ھێزە ئەمنییەكانی توركیا ھەریەكە لە سەڵاحەدین دەمیرتاش و فیگەن یوكسەكداغ ھاوسەرۆكانی ھەدەپە، چەند پەرلەمانتارێكی ئەو پارتەیان دەستگیر كرد و تا ئێستاش لە بەندیخانەیێكی باكووری رۆژئاوای شاری ئەدرنەدا بەند كراون.

سەڵاحەدین دەمیرتاش داوای كردووە، داهاتی كتێبەكەی بۆ قۆناغی پەروەردەی منداڵان و گەنجان تەرخان بكرێت.

دەمیرتاش ناوی بێكەس كوڕی "ئۆرهان تونچ"ی هێناوە بۆ ئەوەی پەروەردەبكرێت، كە ساڵی رابردوو لە ژێرزەمینەكانی شاری جەزیرە گیانی لە دەستدابوو بەهۆی هێرشەكانی سوپای توركیاوە.