بەپێی هەواڵی کوردپرێس داریووش پەناهی سکرتێری ژووری بازرگانیی پارێزگای کرماشان لە لێدوانێکدا ڕایگەیاند بڕیارە ڕۆژی چوارشەمە 30ی گەلاوێژی 1398 بەرانبەر بە 21ی ئابی 2019 شاندێکی ئابووریی پارێزگای بابیلی عێراق سەردانێکی سێ ڕۆژەیان بۆ پارێزگای کرماشان هەبێت و چەند پڕۆژەی گرینگی ئابووری لەو سەردانەدا تاوتوێ دەکرێت.

ناوبراو زیادی کرد بەسەرکردنەوەی یەکە پیشەییەکانی پارێزگای کرماشان لە کەرتی خواردەمەنی و پیشەی وەرزێری و پترۆکیمیا و چەند پڕۆژەیێکی دیکە و دیدار کردن لەگەڵ بەرپرسانی فەرمیی ئەنجومەنی پارێزگای کرماشان بەرنامەی کاری ئەو شاندە عێراقییە دەبێت.

پەناهی گوتیشی ئەو شاندە ئابوورییە پێکهاتووە لە سکرتێری ژووری بازرگانیی پارێزگای بابیل و شاندی یاوەری لە بواری کەرەستەی بیناسازی و خواردەمەنییەکان و بەروبوومە جووتیارییەکان.

شایانی باسە پارێزگای کرماشان چەندین مەرز لاوەکی و دەروازەی سنووری فەرمیی لەگەڵ عێراق و هەرێمی کوردستان هەیە و یەک لە خاڵە سنوورییە هەرە گرینگەکانی ئێران بۆ ئاڵوگۆڕی بازرگانی لە ڕێگای وشکانییەوە و ساڵی پار زیاتر لە 3 ملیار دۆلار بەرهەمی ئێرانی لە سنوورەکانی کرماشانەوە بەرەو بازاڕەکانی عێراق هەناردە کراوە.