بەپێی هەواڵی کوردپرێس ڕۆژی یەکشەمە 27ی گەلاوێژ بەرانبەر بە 18ی ئابی 2019 ژنەراڵ حاتەمی وەزیری بەرگریی ئێران لەگەڵ یاسین تەها یاسر وەزیری ناوخۆی عێراق کۆ بوویەوە و لە دیدارە دوو قۆڵییەکەدا تەرکیز کرایە سەر هاوکاریی ئەمنی و سیاسی و فەرهەنگیی نێوان هەردوو وڵاتی عێراق و ئێران.

ژنەراڵ حاتەمی وەزیری بەرگریی ئێران لە دیدارەکەدا ڕایگەیاند ئاسایش و ئارامیی عێراق ستراتێژی و سیاسەتی ئێرانە و ئاسایشی عێراق بە ئاسایشی ئێران دەزانن.

ناوبراو گوتیشی وەزارەتی ناوخۆی عێراق دامەزراوەیێکی ئەمنی و سیاسییە و بەو پێیەش دەتوانێت دەستپێشخەر بێت لە فراوان کردنی هاوکاریی ئەمنی و سیاسی و تەنانەت سەربازیی نێوان عێراق و ئێران.

وەزیری بەرگریی ئێران ستایشی دەوڵەتی عێراقیشی کرد کە ئاسایش و سەلامەتی زیارەتکارانی ئێران لە زیارەتی شوێنە پیرۆزەکان دەپارێزن و گوتیشی پێوەندیی نێوان دوو گەلی ئێران و عێراق تەنها پێوەندیی ستراتێژییانە و سیاسی نییە بەڵکوو هاوبەشیی بیروبڕوا و هاوبەشیی سیاسی و کەلتووری و مێژووییی نێوان هەردوو وڵات وای کردووە پێوەندییەکانی تاران و بەغدا بگاتە ئەم ئاستە بەرزەی ئێستا.

لای خۆیەوە وەزیری ناوخۆی عێراقیش ستایشی هەڵوێستەکانی ئێرانی کرد لە کاتی شەڕی داعش و گوتیشی لەو قۆناغە سەختەدا ئێران یەکەم وڵات بوو کە بە هانای عێراقەوە هات.