به‌پێی هه‌واڵی کوردپرێس، زه‌ید ڕه‌عد حسێن کۆمسیاری باڵای مافی مرۆڤی نه‌ته‌وه‌یه‌کگرتووه‌کان داوای له‌ حکوومه‌تی تورکیا کرد کۆتایی بێنێت به‌ پێشێل کردنی به‌ربڵاوی مافی مرۆڤ به‌ بیانوی تیرۆریزم و له‌ چوارچێوه‌ی دۆخی نائاسایی له‌و وڵاته‌.

حسێن له‌ ڕێوڕه‌سمی ده‌ست­پێکردنی کۆبوونه‌وه‌ی ئه‌نجومه‌نی مافی مرۆڤی نه‌ته‌وه‌یه‌کگرتووه‌کان له‌ ژێنێڤ وێڕای خوێندنی ڕاپۆرتی ساڵانه‌ی مافی مرۆڤ وتی: "تیرۆریسته‌کان ده‌توانن هێرش بکه‌نه‌ سه‌ر ئێمه. ده‌وڵه‌ته‌کان ده‌توانن بۆ به‌ره‌نگاربوونه‌وه‌ی ئه‌و هێرشانه‌ ڕێوشوێنێک بدۆزنه‌وه‌، به‌ڵام ئه‌م کاره‌ نابێت ببێته‌ ئامێرێک بۆ ده‌سه‌ڵاتخوازی و سه‌رکوت کردن.‌"

ناوبراو له‌ ڕاپۆرته‌که‌یدا تورکیای وه‌کوو یه‌کێک له‌و وڵاتانه‌ که‌ شاهیدی پێشێل بوونی به‌ربڵاوی مافی مرۆڤه‌، ناو برد.

حسێن وتیشی: تورکیا چالاکانه‌ له‌ هه‌وڵه‌کانی ئه‌نجومه‌نی مافی مرۆڤی نه‌ته‌وه‌یه‌کگرتووه‌کان به‌شداریی کردووه‌ و بۆ پێشکه‌وتنی مافی مرۆڤ هه‌وڵی داوه‌، به‌ڵام ئه‌و وڵاته‌ ده‌بێ له‌ ناوخۆی سنووره‌کانیشیدا بنه‌ماکانی مافی مرۆڤ ڕچاو بکات.

ناوبراو زیادیشی کرد: ئازادی ڕاده‌ربڕین و ئه‌ندێشه‌ له‌ تورکیا به‌ توندی سه‌رکوت ده‌کرێت و ژماره‌یێکی زۆر له‌ ڕۆژنامه‌وان، فه‌رمانبه‌رانی زانستگا، یاسادانه‌ران، چالاکی مافی مرۆڤ و نوێنه‌رانی ڕێکخراوه‌ مه‌ده‌نییه‌کانی ئه‌و وڵاته‌ له‌ زینداندان.

حسێن جه‌ختیشی کرده‌وه‌: ئیتنیکه‌ ئایینییه‌کان و ئه‌و که‌سانه‌ و ڕێکخراوانه‌ که‌ له‌سه‌ر پرسی کورده‌کان چالاکی ده‌که‌ن زۆرتر کراونه‌ته‌ ئامانج و هێرشیان کراوه‌ته‌سه‌ر.

ناوبراو وتیشی: "ئه‌و که‌سانه‌ که‌ پرسی کورده‌کانیان پێخۆشه‌، ئه‌و که‌سانه‌ که‌ له‌ لایه‌نه‌ سیاسییه‌ چه‌په‌کاندا چالاکی ده‌که‌ن و که‌سانێک که‌ تۆمه‌تی په‌یوه‌ندی له‌گه‌ڵ ئه‌و دوو گرووپه‌ خراوه‌ته‌ پاڵیان، له‌ لایه‌ن حکوومه‌ته‌وه‌ هێرش ده‌کرێته‌ سه‌ریان."

سه‌رچاوه‌: فورات نیووز

کۆدی هه‌واڵنێر: 60104