بەپێی هەواڵی کوردپرێس، ئاژانسی هەواڵی ڕۆیتێرز گفتوگۆی لەگەڵ ژمارەیەک هاووڵاتیی هەرێمی کوردستان لەبارەی "دۆخی عێراق پاش چەندین ساڵ لە ڕووخانی ڕەژیمی سەدام حسێن" ئەنجام داوە و لە ڕاپۆرتێکدا بڵاوی کردۆتەوە.
ئەم ئاژانسە لەبارەی کاریگەریی گۆڕینی حکوومەتی عێراق دەنووسێت: کوردەکانی عێراق پاش ڕووخانی سەدام توانییان ناوچەیەکی خۆبەڕێوەبەر بۆ خۆیان دابمەزرێنن بەڵام ئەم گۆڕانکارییە نەبووە هۆی ڕازامەندیی ئەوان.
ڕۆیتێرز لەبارەی کاریگەریی ڕووخانی سەدام لەسەر کورەکان دەنووسێت: کوردەکان توانیویانە لەو ناوچە خۆسەرەدا کە لە باکووری عێراق دامەزراوە کۆمپانیا نەوتی و گازییە نێونەتەوەییەکان بۆ سەرمایەدانان ڕابکێشن. بەڵام دوو حزبی کوردی یەکێتیی نیشتمانی و پارتی دیموکرات لەسەر سامان و داهاتەکانی هەرێمی کوردستان ململانێ دەکەن.
ئەم ئاژانسە لە درێژەدا ئاماژەی داوە بە هەوڵدانی حزبە کوردییەکان بۆ دەستپێڕاگەیشتن بە سەربەخۆیی زیاتر و دەنووسێت: کاتێک کە کوردەکان لە ساڵی 2017دا ڕیفراندۆمی سەربەخۆییان بەڕێوەبرد حکوومەتی ناوەندیی عێراق هێزی ناردە سەر چەند ناوچەیەک و ئەو ناوچانە لەژێر کۆنترۆڵی کوردەکان دەرهێنرایەوە و پشکی هەرێم لە بوودجەی عێراق بڕا.
هاووڵاتییانی کورد کە قسەیان بۆ ڕۆیتێرز کردووە بڕوایان وایە کە لەسەردەمی سەدام حسێندا تەنها بنەماڵەیەک دەستیان بەسەر ماڵ و سامانی عێراقییەکاندا گرتبوو بەڵام ئێستا سەدان کەس سەریان هەڵداوە کە سەرچاوەکان و سەروەت و سامانی خەڵک دەدزن.
Your Comment