بەپێی هەواڵی کوردپرێس، ڕۆژنامەی فایننشیاڵ تایمز لە وتارێکدا سەبارەت بە مەیلی تورکیا بۆ ئاشتبوونەوە لەگەڵ حکوومەتی ناوەندیی سووریا سەرەڕای داگیرکردنی ٥٪ خاکی ئەو وڵاتە، نووسیویەتی: بێمتمانەیی قووڵ لە نێوان هەردوولادا هەیە و پڕۆسەی ئاشتی ڕووبەڕووی ئاستەنگی زۆر بووەتەوە.
ئەم ڕۆژنامەیە لەبارەی ئامانجەکانی تورکیا بۆ ئاشتبوونەوە لەگەڵ سووریا نووسیویەتی: ڕەجەب تەییب ئەردۆغان، سەرۆک کۆماری تورکیا دەیەوێت لە سەروبەندی هەڵبژاردنەکاندا پلانی ئۆپۆزسیۆنی تورکیا بۆ ئاشتبوونەوە لەگەڵ دیمەشق تێکبدات و هەروەها بەوهۆیەوە کە بۆ هێرش کردنە سەر کوردەکان ڕووبەڕووی دژایەتیی ڕووسیا بووەتەوە، دەیەوێت بە نزیکبوونەوە لە دیمەشق، حکوومەتی ناوەندی سووریا لە دژی کورد بوەستێنێت.
ئەم ڕۆژنامەیە جەختی لەوە کردووەتەوە کە هێرش و هەڕەشەکانی تورکیا بۆ سەر کوردەکانی سووریا زیاتر و زیاتر کوردەکانی لە دیمەشق نزیک کردۆتەوە.
فایننشاڵ تایمز جەختی لەوە کردووەتەوە کە بەشێک لە خواستی تورکیا بۆ ئاشتبوونەوە لەگەڵ دیمەشق دەگەڕێتەوە بۆ بێهیوا بوونی ئەردۆغان لە بەدەست هێنانی ڕەزامەندیی واشنتۆن و مۆسکۆ بۆ هێرشی سەربازیی نوێ بۆ سەر کوردەکانی سووریا.
Your Comment