بەپێی هەواڵی کوردپرێس، ڕێکخراوى UNCTAD کە سەر بە نەتەوەیەکگرتووەکانە، لە ڕاپۆرتێکدا ئاشکراى کردووە لەساڵى 2013وە تا کۆتایی ساڵى 2018، عێراق 36 ملیار دۆلار زیانى بەرکەوتووە، ئەوەش بەهۆى ناجێگیرىی بارى سیاسی و ئاسایش و جەنگى ئەو وڵاتە لەگەڵ داعشدا.

ڕاپۆرتەکە ئاماژەى بەوەش کردووە، تەنها لەساڵى 2018دا عێراق چوار ملیار و 885 ملیۆن دۆلار زیانى کردووە، بەڵام لەساڵى 2017دا بڕى زیانەکانى وڵاتەکە بریتى بووە لە پێنج ملیار و 32 ملیۆن دۆلار.

لەبارەى وردەکاریی ئەو زیانانە، ڕاپۆرتەکە ئەوەى خستووەتەڕوو، ساڵى 2016 بڕى زیانەکانى عێراق شەش ملیار و 256 ملیۆن دۆلار بووە، لەکاتێکدا لەساڵى 2015دا حەوت ملیار و 574 ملیۆن دۆلار بووە، بۆ ساڵى 2014یش عێراق زۆرترین زیانى بەکەوتووە کە بڕەکەى بریتی بووە لە 10 ملیار و 176 ملیۆن دۆلار، لەساڵى 2013 بڕى زیانەکان کەمتر بووە کە بریتی بووە لە دوو ملیار و 335 ملیۆن دۆلار.

ڕێکخراوەکە لە ڕاپۆرتەکەیدا جەخت دەکاتەوە کە ئابووری عێراق لەماوەی چەند ساڵی ڕابردوودا بەهۆی نائارامی و ناسەقامگیریی سیاسی و جەنگەوە لە ناوچەکە زۆر دابەزینی بەخۆوە بینیوە.

سەرچاوە: سۆمریە نیووز

کۆدی هەواڵنێر: 60113